IX-BA píde-yos a los socialistes asturianos que tomen exemplu del pautu ente socialistes y nacionalistes gallegos

El pautu que se dio a conocer esti sábadu ente socialistes y nacionalistes gallegos, yá socios de gobiernu y que llegaron a un documentu de mínimos colos puntos que les dos fuerces polítiques van defender que s'inxerten na reforma del estatutu d'autonomía gallegu valió-y de casu prácticu al diputáu d'IX-BA Aurelio Martín pa pidir que n'Asturies IX-BA y FSA-PSOE faigan daqué asemeyao.


El pautu previu ente los socialistes y la coalición d'izquierda asturiana que propón Martín tendría de presentase dempués énte'l PP pa que los conservadores asturianos entraren a la negociación.

Aurelio Martín emponderó'l camín pol que van mandase en Galicia pa llevar alantre la so reforma estatutaria, sorrayando que son "los socios de Gobiernu los que pacten primero" y dio a entender que, de proponer esta vía, la FSA diba meyorar enforma la situación de tensión que se vive anguaño ente los dos socios de gobiernu por causa del repartu de cargos ente PP y PSOE al frente del nuevu cargu de la Procuradoría Xeneral d'Asturies.