IX-BA-LV y PP siguen coles crítiques a les cuentes pal 2008 del executivu

Izquierda Xunida-Bloque por Asturies-Los Verdes aseguró ayeri que los presupuestos de la Conseyería d'Infraestructures, Política Territorial y Vivienda, nun cumplen los oxetivos marcaos nel Plan de Vivienda" y aseguró qu'en llugar de da-y puxu a la vivienda lo que se fai ye da-y "un frenazu". Pela so parte'l PP criticó les actuaciones del Gobiernu en materia de carreteres y aseguró que nel añu 2000 destinábense 31 millones d'euros a carreteres, el 16 por cientu del presupuestu y casi diez años dempués el Principáu destina poco más del tres por cientu, calificando de "verdaderu escándalu" la baxada de fondos.

Los populares calificaron amás la intervención de "estrambótica" y criticaron que los miembros del Conseyu de Gobiernu nun ofrecieren la información que-yos solicitaron los grupos parlamentarios.

Les polítiques en materia de Vivienda y Carreteres fueron ún de los motivos d'alderique demientres la intervención del titular d'Infraestructures, Política Territorial y Vivienda, Francisco González Buendía, na Xunta Xeneral del Principáu xunto al restu del so equipu pa esplicar el presupuestu del 2008 pa la so conseyería.

El diputáu d'IX-BA-LV, Aurelio Martín, foi l'encargáu d'entrugar al conseyeru. Parte de les sos crítiques xiraron sobre los presupuesto en materia de Vivienda, qu'al so xuiciu sube dalgo más d'un cuatro por cientu en llugar del doce anunciáu pol Gobiernu, si se tien en cuenta que parte de les partíes correspuenden a Urbanismu y otra parte correspuende a Fondos Mineros.

"Queda asina a 21 millones de cumplir los oxetivos del Plan de Vivienda y nun val aplicar el trucu d'aplicar partíes de los Fondos Mineros, proque nun taben previstes nel Plan", dixo Aurelio Martín.

Martín destacó amás la necesidá de crear un fondu d'hipoteques "tan anunciáu por Areces". "Un presupuestu qu'en términos reales baxa y que nun cumple lo acordao nel Plan de Vivienda", dixo Martín qu'indicó qu'ante tales cuentes al so grupu sólo pues mostrar la so "decepción".

Buendía arrebatió estos datos a Martín y aseguró que con estos presupuestos más lo que llograron que comprometa'l Gobiernu central van cumplir tolos compromisos en materia de Vivienda y les ayudes van llegar a tolos posibles beneficiarios. "Nenguna preocupación al respecto", dixo Buendía.

Pela so parte, el diputáu del PP, José Agustín Cuervas Mons, acusó al Gobiernu de dexar ensin gastar una importante partida presupuestaria en materia de Vivienda'l pasáu exerciciu y criticó la "mala xestión" del Executivu.

Manifestó amás que l'Executivu nun cumplió los sos compromisos en materia de Vivienda y "añu tres añu cuenten los mesmos proyectos".

A les entrugues sobre la utilización del derechu a tantéu y retractu, Buendía manifestó qu'hasta agora malpenes s'aplicó, pero indicó que se trata d'una figura que tien previsto fomentar nel 2008.

Cuervas Mons tamién interrogó al conseyeru polos enllaces de San Claudio, pa los que "nun hai partíes reservaes", a lo que'l conseyeru respondió que si'l Conceyu recueye'l guante llanzáu atoparíase la manera de desarrollar eses obres y financiaríense al 50 por cientu.

Per otra parte, a les entrugues d'Aurelio Martín sobre'l desarrollu del Tren-Tran, Buendía manifestó que nel 2008 esperen "arrancar con plena potencia" y a lo llargu d'esti añu van tar llistos los estudios sobre'l 'Tren-tran' y va contase ya con un marcu temporal. Martín criticó'l descensu de les partíes presupuestaries previstes pal Plan d'Ordencación del Llitoral 'Pola', frente al espectacular incrementu de la partida pa trabayos d'investigación.

L'ausencia del director xerente de Sedes, Santiago Caicoya, na Comisión, a pesar de tar convocáu, provocó'l maletar del Grupu Popular, que pidió la suspensión de la comisión. El diputáu del PP, Pelayo Roces, exixó "respetu a la comisión" y nun aceptó que Buendía respondiera en nome de Caicoya.

El presidente de la comisión viose obligáu a suspender de manera momentánea la mesma pa llocalizar a Santiago Caicoya, que finalmente pudo intervenir tres asegurar que desconocía la convocatoria y pudo responder a les entrugues del grupu parlamentariu del PP.

La diputada del PP, Alejandra Cuétara, recriminó al Gobiernu que nun se-y presentara les cuentes de Sedes, alegando deberes de "llealtá, secretu y confidencialidá". "Cómo piensa usté que yo puedo facer el mio trabayu de fiscalización si nun me facilita la información que-y solicito", entrugó Cuétara a Caicoya, al que recordó que "xestiona recursos públicos y que debe llealtá al Parlamentu asturianu".

Caicoya recordó que Sedes ye una sociedá mercantil y non creada por llei pol Parlamentu y aseguró que tres consultalo con profesionales, no que se refier a contratos cola empresa nun sólo nun ta obligáu a facilitalos, sinón que tien de pidir permisu pa ello.

La respuesta de Caicoya provocó dures crítiques por parte de la diputada 'popular' qu'insistió na obligación per parte del xerente de Sedes d'entregar a los grupos parlamentarios la información que-y seya solicitada. Asina, la diputada del PP, Ana Barrientos, calificó de "estrambótica" la intervención de Caicoya.

Na so intervención Buendía destacó que se trata de "una conseyería inversora dafechu, que precisa pol bien de tolos asturianos que'l presupuestu llegue a bon fin y s'apruebe, porque sinón conllevaría frentar dalgunes obres y hasta que proyectos nuevos nun se puedan desarrollar".

Francisco González Buendía afirmó que la so Conseyería lleva 318,7 millones d'euros del total del presupuestu previstu pal 2008, lo que supón un incrementu respecto al añu anterior del 3,81%, y siendo la tercer Conseyería con mayor presupuestu, tres Sanidá y Educación.

Pal PSOE les cuentes presentaes pretenden siguir avanzando na consecución de la máxima cohesión social y territorial, faciendo que la mesma medre en términos económicos, polo que pidieron al restu de los grupos el so apoyu a los presupuestos.