IX-BA-LV va proponer na Xunta Xeneral l'actualización de la LLei d'Asturianía

El diputáu na Xunta Xeneral d'Izquierda Xunida-Bloque por Asturies-Los Verdes, Francisco Javier García Valledor, anunció esti vienres que'l so grupu parlamentariu va proponer na Xunta Xeneral del Principáu l'actualización de la Llei d'Asturianía.

Valledor realizó estes manifestaciones na rueda de prensa qu'ofreció güei pa presentar una proposición de llei que reconoz "la delda d'Asturies cola so xente nel esterior". El testu reconoz los derechos sociales de los asturianos emigraos.

L'ex - conseyeru de Xusticia manifestó que pasaron más de 20 años dende la entrada en vigor del vixente marcu llegal pol que se rixen les comunidaes asturianes y apuntó la necesidá de "actualizar esta normativa p'adaptala a les necesidaes reales y a les reivindicaciones plantegaes polos asturianos del esterior".

También ye ncesaria, continuó Valledor, "la creyación d'instrumentos pa interrelacionar la emigración asturiana histórica cola nueva emigración principalmente xuvenil".

Como elementu xeneral d'especial importancia destacó la busca de la erradicación de desigualdaes "que tovía puedan persistir nel sen de delles Comunidaes Asturianes que van tener d'adaptar los sos estatutos a los valores y principios de la Constitución Española y del Estatutu d'Autonomía".

Valledor destacó'l títulu II de la norma propuesta que regula los derechos que-yos son reconocíos a los asturianos del esterior y les prestaciones a les que puen optar y entre los que tan: salariu social básicu, cobertura residencial a los emigrantes mayores y l'accesu a la vivienda, too esto pa los retornaos; programes d'ayuda económica a persones en situación d'emerxencia, cobertura sanitaria, places en residencies pa mayores y atención a les persones con discapacidaes, pa los asturianos y asturianes que tean fuera d'Asturies.