IX-BA-LV llogra los sos meyores resultaos por conceyos en L.lena y Illas

Les llistes de la coalición IX-BA-LV llograron un total de 98 conceyales en 38 conceyos asturianos, anque los que más contentu-yos dieron a los representantes de la formación, y especialmente a los de Bloque por Asturies, foron los trés algamaos en L.lena onde IX-BA-LV convertióse na fuerza más votada col 32% de los sufraxos, algamando 6 conceyales, trés d'ellos pertenecientes a la formación de Rafael Palacios, un resultáu que dexa en segundu planu al PSOE l'hasta agora alcalde Hugo Morán, tamién con 6 conceyales pero con menos votos.

IX-BA-LV ye tamién la fuerza mas votada n'Illas col 37% y con 4 conceyales. En Degaña, otru de los conceyos fuertes de la coalición, IX ta empatada a trés conceyales con PP y PSOE. La formación d'izquierdes pue gobernar en Castrillon al ser la segunda mas votada con 7 conceyales por 5 del psoe y 9 del PP. En Grau IX-BA-LV son tamién segunda fuerza con 5 conceyales contra los 6 del PP. N'Avilés, Cangas del Narcea, Llangreu, Mieres o Xixon IX-BA-LV son llave pa pautos de gobiernu coles mayoríes relatives socialistes.

Estos resultaos rescamplen énte los fracasos electorales de la coalición, que nun entró nel conceyu d'Uviéu al sufrir una perda de votos equivalente a los que llogró la llista d'ACI, encabezada polos conceyales espulsaos d'IX con motivu de la crisis interna de la organización. En Llanes, onde tamién se presentaba una lista d'ACI, nenguna de les dos opciones llogró representación, perdiendo IX el conceyal que tenía.