IX-BA-LV critica los presupuestos el mesmu día en que llegaron a la Xunta Xeneral

El conseyeru d'Economía y Asuntos Europeos, Jaime Rabanal, entregó ayeri'l proyectu de Llei de Presupuestos pal 2008 a la presidenta de la Xunta Xeneral del Principáu María Jesús Álvarez, colo que va entamar la tramitación parlamentaria del mesmu. Rabanal, en declaraciones a los periodistes, insistió llueu nel "rigor" col que s'ellaboraren estes cuentes y volvió a apelar a la "responsabilidá" de los Grupos parlamentarios pa sacar alantre les cuentes.

Mientres Rabanal entregaba'l llapiceru de memoria coles cuentes a la presidenta de la Xunta Xeneral del Principáu, el Coordinador Xeneral d'Izquierda Xunida d'Asturies, Jesús Iglesias, echaba pel proyectu de cuentes agora pendiente d'aprobación en parlamentu asegurando que l'Executivu asturianu optaba nestos presupuestos por "conxelar" les partíes relatives a les polítiques sociales.

Iglesias señaló que los presupuestos confirmen que "la mentira d'Areces esmorónase y que l'anunciada política social del Gobiernu "paez una nueva edición del déficit cero".

"Más qu'afondar en derechos sociales como anunciaron, los númberos demuestren que se conxelen los gastos destinaos a estes polítiques tan importantes n'Asturies", afirmó Jesús Iglesias.

El líder d'IX criticó la "gran resquiebra" ente lo que'l presidente del Principáu, Vicente Álvarez Areces, predica y llueu fai. Nesti sen, dixo que l'anunciada "apuesta" pol salariu social lléndase a destinar la mesma partida que va executase esti añu.

El Coordinador Xeneral d'IX entrugóse cómo ye posible falar d'un incrementu presupuestariu cuando realmente se conxela la partida. "Asturies tien de ser más ambiciosa colos pensionistes y les muyeres soles con cargues familiares, que son dos de los principales grupos beneficiarios del salariu social", dixo Iglesias.

Añadió que les polítiques de vivienda sufren tamién un "desfase propagandísticu" ente les promeses y los fechos constatables. El presupuestu de vivienda pal añu 2008 rexistra 88 millones d'euros, "incumpliendo una vez más les inversiones comprometíes, solamente pa promoción y ayudes, que yeren de 103 millones d'euros, según el Plan Asturianu de Vivienda 2006-2008", comentó'l dirixente d'IX.

Recordó Iglesias qu'esta selmana ya conoció'l presupuestu del ERA, l'organismu autonómicu que xestiona les residencies pa persones mayores, dirixíu a financiar establecimientos y centros pa los mayores, y que nun s'incremente al mesmu ritmu que n'años anteriores, con IX nel Gobiernu, y malpenes garantiza les inversiones comprometíes, "que, nun olvidemos, son mui necesaries pa l'aplicación de la Llei de Dependencia".

IX considera qu'Asturies pue permitise un mayor esfuerciu inversor y el presupuestu pue crecer penriba'l 7 por cientu, pa destinar más dineru al emplegu, les polítiques de vivienda y sociales. "Al gobiernu d'Areces falta-y ambición", señaló Iglesias.