IV Seminariu ‘Oficialidá’: esperiencies en territorios con llingües non oficiales

El vienres y el sábadu va celebrase n’Uviéu IV Seminariu ‘Oficialidá, el camín constitucional pal futuru del asturianu’ baxo'l nome ‘Entrín y non. Normalizar enantes de la oficialidá’. Van participar espertos de Lleón, Val d'Aran y Aragón, amás d’asturianos y d’Euskadi y Galicia.

“Vamos reflexonar nesta cuarta edición del seminariu alredor d’esperiencies qu’ocurren n’otros territorios onde tamién situaciones asemeyaes de llingües protexíes estatutariamente pero que nun son oficiales”, aseguró Inaciu Galán, vocal d’Iniciativa pol Asturianu, asociación organizadora, na presentación celebrada ayeri na sala de prensa del Edificiu Históricu de la Universidá d’Uviéu, allugamientu onde va tener llugar les conferencies y alderiques plantegaos esti añu, en concretu na Aula Magna. Una oportunidá de poner en común y garrar idees coles que trabayar “nel marcu d’esta llexislatura y d’esta realidá llegal que tenemos que ye’l que xenera l’Estatutu d’Autonomía y la Llei d’Usu” hasta que s’algame’l tan demandáu consensu pola oficialidá.

Álvaro Rosales, de la Universidá de Lleón, va poner el vienres a les 17.30 hores, la ponencia ‘La situación llegal del asturllionés nel marcu de la comunidá autónoma de Castiella y Lleón’, pa depués Manex Mantxola, coordinador de Kontseilua, falar de ‘La normalización del euskera en Nafarroa’. Vas pesllar esa xornada, que va inaugurar a les 16.30 hores el rector Ignacio Villaverde, el periodista Ferriol Macip i Bonet pa tratar de ‘L’occitanu, una llingua oficial en Cataluña”.

La comunicadora aragonesa Silvia Cebolla, el sábadu a les 12.30 hores, va compartir qué ye ‘Ser influencer y presentadora nuna llingua non oficial. Esperiencies positives dende los medios y les redes sociales na normalización del aragonés’. Yá de tarde, a les 18 hores, va entamase una mesa de diálogu ‘Les llingües nel Congresu y otros retos de la normalización nel ámbitu estatal con representantes d’A Mesa pola Normalización Lingüística (Galicia), Nogará (Aragón), Kontseilua, Faceira (Lleón) y Iniciativa pol Asturianu.

Declaración d’Uviéu

A les 19 hores, enantes del pieslle musical, que va correr a cargu de Mestura, va lleese’l manifiestu ‘Declaración d’Uviéu’. Ésta va ser una reclamación conxunta pa reivindicar “distintos puntos no que cinca a la divulgación del asturianu y les demás llingües nel ámbitu estatal”, adelantó Galán, como pue ser la presencia en RTVE.

Amás, nel seminariu van tocase otros temes importantes, como ‘La reforma de la Llei 1/1998, d’usu y promoción del asturianu: retos y propuestes’, el sábadu a les 16.30 hores, a cargu del abogáu Nicolás Bartolomé; una mesa redonda entitulada ‘Del bable nes escueles al asturianu na intelexencia artificial. 50 años de reivindicación mirando al futuru’, con Lluismi Orviz, Arantza Margolles, Ramón d’Andrés, Aymara González Montoto y Iris Díaz Trancho, esi mesmu día a les 10.30 hores; la Xira pola Oficialidá o l’Archivu de la Represión Llingüística del Asturianu (ARLAS). Tamién va estrenase al meudía’l documental ‘Normalizar con intelixencia. L’asturianu énte los retos tecnolóxicos y comunicativos del futuru’.

Inscripción y accesu de baldre

Dende Iniciativa pol Asturianu animen a representantes políticos y de la sociedá civil a que “vengan a esti espaciu abiertu a persones de toles tendencies polítiques. Tamos buscando construyir un consensu na sociedá que va más allá de les ideoloxíes de caún que van nel respetu a los derechos humanos; na protección d’una riqueza cultural tan importante como ye un idioma y la cultura que va arreyada a él”. “Va ser interesante, arriquecedor, con una bayura de testimonios importante que de xuru que va permitinos avanzar nesti campu de la normalización del asturianu y tamién, per ende, na construcción del consensu pa la oficialidá que siguimos trabayando día y día, y que toi seguro de que llograremos a non tardar”, finó Galán.

L’accesu a les actividaes del seminariu ye de baldre, anque la organización recomienda la inscripción al tener preferencia nel casu de que se complete l’aforu. Pue formalizase al traviés d’esti enllaz.

Na semeya, Xuan Pandiella y Galán.