Iris Díaz Trancho presenta una nueva obra de lliteratura xuvenil

El próximu vienres 9 de febreru preséntase a les 20 hores na sala de conferencies del Centru de Cultura Antiguu Institutu, en Xixón, la obra "La neña de les trences al revés" de la que ye autora Iris Díaz Trancho y que cuenta col acompañamientu de los dibuxos de Sara Rosado.

La casa editorial Trabe ye l'autora d'esta obra editada a tou color y en tapa dura, que contrapón dos mundos n'apriencia estremaos, el d'una neña asturiana, de nome Deva, y el d'otra neña de Mali, n'África, que se llama Thana. Dos moces que, anque lleven les trences peinaes de manera distinta, descubren que los sos mundos son bastante paecíos.



Iris Díaz Trancho, ganadora del Premiu de lliteratura infantil que convoca l'Academia de la Llingua Asturiana, nació en Xixón nel 1981, nuna familia vinculada a la recuperación de la cultura asturiana y a Conceyu Bable dende mediaos de los años setenta. El so padre, Monchu Díaz, publicare a primeros de los años ochenta'l llibru de poemes Rezumes d'amor y griesca. Pela so parete, la ilustradora Sara Rosado (Xixón en 1981) ye llicenciada en Belles Artes, na estaya de pintura, pola Universidá de Salamanca, trabayando actualmente en Mallorca.