Institutos de secundaria retiren la opción d'asturianu

Alejandro Blancoy Nicolás Bardío, estudiantes del IES Alfonso II d'Uviéu, participaron esta mañana nuna rueda de prensa organizada pola Xunta Pola Defensa de la Llingua Asturiana na que la organización cívica denunció les precaries condiciones en que se da la enseñanza d'asturianu na secundaria.

Según s'esplicó na comparecencia pública, los dos estudiantes del institutu uvieín, que recibieren enseñanza d'asturianu en primaria, escoyeron, al llegar al Institutu, matriculase n'asturianu, marcando la opción correspondiente. L'IES nun fizo entós grupu d'asturianu, pero ello ye qu'al llegar a segundu cursu, la opción a pidir asturianu nin siquiera nun apaecía nos impresos de matrícula, una práctica qu'entienden illegal en cuantes que tolos centros tienen la obligación d'ufiertar l'asignatura en tolos cursos ensin escepción. Ello llevó definitivamente a los estudiantes del centru a mandase a la Xunta Pola Defensa de la Llingua Asturiana en busca de sofitu. Na mesma rueda de prensa en que se dio a conocer esti casu, los representantes de la Xunta, Xulio Casado y Pablo Rodríguez, esplicaron que tienen conocimientu de más centros, citando'l casu del IES "Doña Ximena" de Xixón, onde aseguren que se procede d'esta mesma manera.

Los representantes de la la Xunta Pola Defensa de la Llingua Asturiana esplicaron que la mesma llei d'usu del asturianu de 1998 diz nel so artículu 10 que "nel exerciciu de les sos competencies, el Principáu d'Asturies ha garantizar l'enseñu del bable/asturianu en tolos niveles y graos, respetando sicasí la voluntariedá del so deprendimientu" disposición llegal qu'obliga a ufiertar l'asignatura ensin dexar opciones. Contra lo que manda la llei, la la Xunta diz que los dos centros educativos citaos na rueda de prensa son namás "un exemplu" de lo que pasa en más centros educativos n'Asturies.

El fechu de que munchos centros retiren la opción d'asturianu nos impresos de matrícula ye, según Xulio Casado, una torga más que vien a amestase a la necesidá de que pa que se dea efectivamente l'asignatura se faiga un grupu mínimu d'alumnos en cada centru. Los representantes de la Xunta esplicaron que yá-y tien solicitao a la Conseyería d'educación qu'inspeccione l'incumplimientu d'esta obligación por parte de los centros, y nun anunciaron que nun descarten la posibilidá d'adoptar midíes llegales nesti asuntu.

Igualmente, los representantes de la Xunta sorrayaron la responsabilidá política nello de tol gobiernu asturianu, entamando pol Conseyeru d'Educación una cadena de responsabilidaes que remata nel Presidente asturianu. Pablo Rodríguez espresó l'enfadu de la Xunta pol fechu de que, nuna llexislatura na qu'esiste un pautu de gobiernu que se presenta como ferramienta pa la defensa del asturianu, se permita'l que se dean estes situaciones.

Un casu rellacionáu con esti y qu'apaeció na rueda de prensa foi'l de Catuxa Bermeyu , l'alumna del IES Naranco que tampoco nun recibe clas d'asturianu, un asuntu sobre'l que Xulio Casadoquixo espresar la solidaridá de la Xunta cola situación pela que pasa la familia