Iniciativa pol Asturianu celebra’l segundu centenariu del nacimientu de Xuan María Acebal

|

La lliteratura asturiana va ser homenaxada esti sábadu n’Uviéu. Iniciativa pol Asturianu entama un actu nel cementeriu San Salvador con motivu del segundu centenariu del nacimiento de Xuan María Acebal y va reivindicar darréu na plaza la Escandalera les pallabres asturianes al traviés del regalu de llibros.

Nacíu n’Uviéu’l 8 de marzu del 1815, Acebal desendolcó estudios de Llatín, Humanidaes y Filosofía n’Asturies y Madrid, y destacó como un gran poeta en llingua asturiana. Conocíu como ‘Príncipe de los poetes bables’ pol so rigor llingüísticu y altor lliterariu, espublizó parte de la so obra na prensa del país, anque ésta nun se recoyó nun llibru hasta’l 1925, cuando Enrique García Rendueles inxerta en ‘Los nuevos bablistas’ seis poemes de so y dos traducciones d’Horacio. La obra completa d’Acebal, que finó n’Uviéu nel 1895 a los 79 años d’edá, nun vería la lluz hasta’l 1995, de la mano d’Antón García con motivu del centenariu de la muerte del escritor y la Selmana de les Lletres Asturianes, dedicada al uviedín.

Dada la cercanía cola fecha del segundu centenariu de la so nacencia, Iniciativa pol Asturianu entama un actu de reconocimientu al autor que tamién quier ser un homenaxe a la lliteratura asturiana. Ésti va celebrase mañana a les 11 hores nel cementeriu San Salvador y va consistir na llectura de poemes d’Acebal y unes pallabres sobre la so figura nel llugar onde descansen los sos restos.

‘Llibros por pallabres’

Con un calter más divulgativu, los miembros de l’asociación que trabaya pola normalización del idioma, van desplazase a la plaza la Escandalera pa poner en marcha la iniciativa ‘Llibros por pallabres’ a les 12.30 hores. Asina, van instalar una muria onde los ciudadanos van poder escribir una pallabra n’asturianu y, por ello, recibirán una obra n’asturianu de baldre. Esta actividá pretende “promocionar les lletres asturianes y la llectura na nuesa llingua” al mesmu tiempu que reivindicar “los 175 años de llibru n'asturianu, una fecha que tuvo llugar nel 2014 y que nun cuntó con nengún tipu de reconocencia per parte de les alministraciones”.

Contador Estadistiques