Iniciativa pol Asturianu participó na I Nit de la Llengua al Món Digital que tuvo llugar en Barcelona

|

Vítor Suárez, vicepresidente d’Iniciativa pol Asturianu, participó na I Nit de la Llengua al Món Digital ‘Viquimarató’ celebrada la selmana pasada en Barcelona. La so función foi tornar al asturianu artículos sobre la llingua catalana pa Uiquipedia.

Más de trenta voluntarios participaron na ‘Viquimarató’ que tuvo como sede’l Centre de Documentació de la Direcció General de Política Llingüística, en Barcelona. L’oxetivu de la mesma yera ampliar les referencies fiables sobre los artículos esistentes sobre la llingua catalana en Viquipèdia, la Uiquipedia catalana, pa lo que s’entamo una xornada de trabayu dende les 18 hores a la medianueche. Nella tamién participó Suárez, que se dedicó a tornar al asturianu artículos sobre’l catalán pa Uiquipedia, enciclopedia llibre n’asturianu que suma más de 19.000 artículos, marca algamada con ún sobre la ‘Hestoria de la llingua catalana’ fecha mientres esta cita.

La visita a Catalunya sirvió tamién pa que Suárez caltuviera conversaciones sobre la situación de la llingua asturiana con tolos partipantes y con personal de la Direcció General de Política Llingüística, ente ellos la responsable máxima del muérganu, Ester Franquesa i Bonet. D’esta forma, Iniciativa pol Asturianu trata de “da-y sonadía a la situación del asturianu fuera de la nuestra comunidá y facer lo posibles pola so reconocencia fuera de la mesma”, oxetivos que marquen los propios estatutos de la organización.

Na semeya, Suárez charra con Franquesa, direutora xeneral de Política Llingüística de Catalunya.

Contador Estadistiques