Iniciativa pol Asturianu entrega na RAE un informe nel que pide’l cambiu de la definición de ‘asturiano’

|

Inaciu Galán, presidente d’Iniciativa pol Asturianu, entregó esti llunes un informe nel Rexistru de la Real Academia Española (RAE) nel que pide’l cambiu de la definición del términu 'asturiano'.  Ésta ye incorreuta dafechu.

Según el diccionariu de la RAE, ‘asturiano, na’ ye un axetivu y tien la definición siguiente na so tercer aceición: ‘Se dice de la variedad asturiana del dialecto romance asturleonés’. En términos paecíos atopamos ‘bable’ –‘dialecto de los asturianos’–, ‘asturleonés, sa’ –na segunda aceición, ‘Se dice del dialecto romance nacido en Asturias y en el antiguo reino de León como resultado de la peculiar evolución experimentada allí por el latín– y ‘leonés’ –na sésta remite a ‘asturleonés’ y na sétima, ‘Se dice de la variedad del castellano hablada en territorio leonés'–. L’informe d’Iniciativa pol Asturianu’ entregáu güei nes oficines de la institución, que lleva’l títulu ‘Definir el términu asturianu con xeitu/Definir el término asturiano con propiedad’, analiza estes definiciones incorreutes dafechu y presenta argumentos científicos y llegales pa la so igua, dando a la llingua asturiana’l rangu de llingua, al igual qu’asocede con otros idiomes peninsulares.

“Avalen esti informe un llistáu de profesores, que sigue creciendo, y qu’inclúi a más de diez universidaes de países como Xapón o Portugal, a l’actual decana de la Facultá de Filosofía y Lletres de la Universidá d’Uviéu y a caderalgos y profesores”, espliquen dende Iniciativa pol Asturianu, “coleutivu que considera innegable la necesidá de cambiar esta definición del Diccionario de la RAE, pues ye una cuestión de respetu a la realidá sociollingüística d’Asturies y del restu de los territorios asturfalantes”. Esta aición del coleutivu que trabaya pola normalización del idioma ta teniendo muncha repercusión nos medios de comunicación asturianos, con entrevistes a Galán n’emisores de radiu y desplazamientu de los periodistes de TPA en Madrid a la sede de la RAE pa ellaborar una noticia pa los informativos de les 14 y de les 20.30 hores.

Na semeya, Galán momentos enantes d'entrar nes oficines de la RAE.

 

Contador Estadistiques