Iniciativa pol Asturianu entama un mercadín de llibros en Xixón

Dende esti martes, y hasta’l xueves, el Conseyu de la Mocedá de Xixón va disponer d’un puestín de llibros en llingua asturiana. Iniciativa pol Asturianu va vender obres a partir de dos euros y el mapa coles parroquies d’Asturies.

D’esta forma, el coleutivu que trabaya pola normalización del idioma pretende promocionar el regalu de llibros en llingua asturiana de cara a les fiestes navidiegues. L’horariu de venta va ser de 17 a 21 hores nel llocal asitiáu nel númberu 68 de l’avenía Manuel Llaneza. Nel puestín tamién van recoyese llibros de segunda mano. Les persones qu’aprovechen la visita pa facese sociu d’Iniciativa pol Asturianu, pol preciu de 20 euros, van recibir un llibru de baldre.

Otra manera, tamién de cara a estes fiestes, Iniciativa pol Asturianu tien en marcha una campaña pa felicitar n’asturianu nes redes sociales. Pa ello, diseñaron una tarxeta que trae delles posibilidaes: ‘¡Feliz Navidá!’, ‘¡Bon Nadal’ y ‘¡Felices fiestes!’.