Industria pon-yos tope a los parques eólicos

El conseyeru d'industria presentó ayeri en rueda de prensa les llinies que van marcar el plan d'enerxía eólica d'Asturies. El conseyeru, acompañáu pol director xeneral d'industria Luis María García, y el director de la Fundación de la Enerxía, Manuel Penche, dixo qu'Asturies va poner un tope a a la xeneración de corriente en parque eólicos. El tope va tar en 750 megawatios de potencia total, y estos repartiríense tolo más en trenta parques. Esti tope vien impuestu, al dicir d'Urrutia poles condiciones mediuambientales y paisaxístiques del país. En cuantes que la parte occidental d'Asturies ye la que más proyectos tien solicitaos pa parques eólicos, al Principáu abultába-y qu'había que poner un tope definitivu dos años de pués de qu'industria punxere una moratoria énte la cantidá tan grande de proyectos de parques eólicos que-y presentaron.

Según esplicó Urrutia, agora hai funcionando 85 megawatios d'enerxía eólico y tan en construcción parques hasta facer otros 160 mw, toos d'empreses del sector priváu, pero anque se ponga esi tope de 750 mw, la normativa autonómica va consentir con que los ayuntamientos puedan poner, a títulu particular, minicentrales eóliques de sobre tres megawatios de potencia. El conseyeru reconoció qu'Asturies nun va poder cumplir col oxetivu de la UE, que manda que'l 12 por cientu de la corriente que se produza nel 2010 seya de renovables, y dixo que como muncho va poder llegase al 9%. Los proyectos nuevos de centrales térmiques, como'l grupu 4 de Ribera o el 3 d'Aboño van seguir enanchando la resquiebra ente les renovables y el combustible fósil

Precisamente enantes de la moratoria del 2.001, yeren 69 los proyectos que tenía enriba la mesa la Conseyería, faciendo ente toos una potencia abondo mayor a la qu'agora quier imponer el plan eólicu. Toles comunidaes tan intentando pone-y topes a la producción eólica, casu de Cantabria, qu'anunció que va refugar bien de los 29 proyectos de parques que tien presentaos, y ye que en tol estáu llévense presentaos proyectos qu'axuntaríen una potencia de 25.000 megawatios.