Iglesias resulta escoyíu como secretariu xeneral de Podemos

El sábadu finó'l procesu de l'Asamblea Ciudadana 'Sí se puede' cola presentación de los resultaos de les votaciones. Como s'esperaba, Pablo Iglesias resultó escoyíu como secretariu xeneral.

El madrilanu algamó un 96,87 por cientu de los votos, esto ye, un total de 95.311 sobre 107.488, y consiguió incorporar a tola so xente de confianza al Conseyu Ciudadanu, onde van tar los asturianos Tania González Peñas, Laura Casielles, Segundo González García y Xosé Xuacu Rodríguez Morón. La segunda persona más votada na votación a secretariu xeneral foi Álvaro Monge, con 995 apoyos, un 1,01 por cientu del total. Pa la Comisión de Garantía, resultó escoyida Gloria Elizo, tamién de confianza d'Iglesias, con un 86,12 por cientu de los votos (80.519).

Tres constituyir la estructura de la formación a nivel estatal, Podemos va principiar agora a facer lo propio a nivel municipal. El modelu propuestu ye'l mesmu y hasta'l 5 d'avientu ta abierta la presentación de candidatos a la secretaría xeneral y a los conseyos ciudadanos. La votación va facese del 26 al 30 d'avientu y, entemedios, la campaña eleutoral.