Iglesias reclama midíes anticorrupción más contundentes

El candidatu d’Izquieda Xunida a la presidencia del país, Jesús Iglesias, demandó midíes más contundentes pa combatir la corrupción. Tamién reivindicó’l cumplimientu de la memoria histórica y la retirada de símbolos franquistes.
 
“Esperamos tener la fuerza suficiente tres les eleiciones pa sacar alantre midíes anticorrupción y garantizar el funcionamientu honorable de les alministraciones públiques", señaló Iglesias. El candidatu de la coalición comentó que la so formación yá intentó nos meses últimos que saliesen alantre iniciatives como l’endurecimientu del réxime d’incompatibilidaes d’altos cargos o un control mayor p’aquellos que tengan capacidad de dar subvenciones o ayudes, de forma que nunca vayan a empreses de les que sían titulares los sos familiares o amigos. Tamien comentó que nun taría de más que cuando un corruptu condenáu nun restituyese les perres robaes, el so partíu políticu fora responsable subsidiariu.
 
El cabeza de llista d’IX fixo estes declaraciones nun actu na plaza d’España d’Uviéu, xunto a Gaspar Llamazares y el maxistráu eméritu del Tribunal Supremo, José Antonio Martín Pallín, pa demandar la retirada de símbolos franquistes, como’l medayón de Franco que se conserva nel llugar. Iglesias reivindicó’l cumplimientu de la memoria histórica, porque suponía un reconocimientu de les víctimes del franquismu, mentes que Martín Pallín señaló que’l réxime franquista foi una dictadura "sangrienta" y que la derecha española "siéntese güérfana" ensin ella.