Ibarra nun se da

Dempués de retirar la propuesta de reforma de la Llei electoral en que pidía un mínimu del 5% del votu en tol estáu pa poder acceder a un escañu en Congresu de los diputaos, el presidente Extremeñu Rodríguez Ibarra sigue ocupando sitiu nos medios de comunicación pa esplicar les razones que lu llevaron a presentar la propuesta. El "espolín Ibarra" vivió esta mañana un nuevu episodiu de fonda gravedá mediática nel programa "Hoy por hoy" de la Cadena Ser.

Ibarra llamó por teléfonu al espaciu que lleva Iñaki Gabilondo pa esclariar los porqués de la so propuesta. A lo llargo de venti minutos d'entrevista que puen escuchase enteros nel web de la emisora, el presidente estremeñu esplicó que'l nacionalismu yera un problema a desaniciar. Pa ilustrar esi peligru, el dirixente socialista esplicó qu'España tenía nel 78 dos nacionalismos y qu'agora había una bayura d'ellos. Ibarra denunció la supuesta traición de los nacionalistes vascos que rompieren, facienfo referencia al plan Ibarreche, el pautu que-yos ofrecieren les fuerces estatales na transición, cosa que ponía en peligru la estabilidá del estáu. Ibarra tamién llamó l'atención sobre l'apaición de nueves opciones nacionalistes en congresu,a les qu'identificó como "cha, che, chi" que namás teníen por oxetivu caciplar pa conseguir beneficios pa los sos territorios y que desvirtuaben la vida política normal.