IAS y Xunta Pola Defensa de la Llingua Asturiana denuncien l’arbitriariedá y falta de rigor del Conseyu Consultivu

La organización de defensa del idioma Xunta Pola Defensa de la Llingua Asturiana y el partíu políticu Izquierda Asturiana reaccionaron güei énte les primeres informaciones apaecíes na prensa sobre l'informe del Conseyu Consultivu d'Asturies nel que se planteguen delles cuestiones alredor de la reforma del estatutu d'autonomía.

Mientres la Xunta "dulda de si esi informe nun será más qu'una coartada del presidente Areces pa xustificar les sos posiciones ideolóxiques al respective del asturianu", siendo l'informe pa la organización "una retafila d'opiniones ideolóxiques mazcarada dientro d'un informe xurídicu" IAS diz que l'informe ye "una tomadura de pelo institucionalizada cola que'l gobiernu asturianu insulta a la intelixencia de los asturianos". El portavoz d'esti partíu Ignaciu Llope diz que se trata de crear "una alarma social inxustificada resaltando la oposición de dellos sectores a la normalización llingüística y obviando que la mayoría de la ciudadanía apoya abiertamente una reforma qu'incluya la oficialidá". La Xunta Pola Defensa de la Llingua Asturiana recuerda nesti sentíu que'l Conseyu Consultivu pa facer les delaraciones que fizo sobre l'asturianu nes qu'asegura qu'una parte "non pequeña" de la población diba ver como artificial la normalización "nun pudo manexar estudios sociollingüísticos, porque los qu'hai, encargaos pol propiu gobiernu asturianu, nun-yos dan la razón". Ello lleva a la Xunta a "pensar entós que'l Conseyu basóse pa estes afirmaciones nes conversaciones col so círculu d'amistaes, cosa que resultaría desmerecedora de la oxetividá y rigor de los sos dictámenes". La Xunta denuncia tamién la falta de seriedá del dictamen por "salir de lo xurídico y metese de lleno na socioloxía y na planificación llingüística".

La Xunta alvierte que "les persones que formen parte del Conseyu Consultivu participen de toles zunes y prexuicios d'una cierta clas política refractaria a la recuperación del asturianu" al empar qu'afirma que l'informe vien a reconocer que facer l'asturianu oficial ye una decisión política. Tamién IAS afonda nesta opinión asegurando'l so portavoz Ignaciu Llope que les conclusiones que se conocen del informe son les d'un "conseyu d'afines que ratifiquen les tesis de la FSA sobre lo que ye Asturies" sorrayando'l fechu de que "la opinión de los miembros del Conseyu Consultivu sobre si Asturies debe llamase comunidá, rexón o nacionalidá nun val más que la de cualesquier otru ciudadanu, yá que nun espresa más qu'una opción política".