I Xornadas de toponimia del Eo-Navia

Esti próximu vienres 19 de mayu y
sábadu 20 van celebrase en A Caridá (Conceyu d’El Franco) les primeres
“Xornadas de toponimia del Eo-Navia”, que col lema “Os nomes dos nosos sitos”,
tan entamaes pol conceyu d’El Franco y la Conseyería de Cultura.

Durante dos sesiones diversos espertos
van facer delles comunicaciones alredor de la toponimia de la zona más
occidental del país. D’esti mou, na primera de les sesiones, que va realizase’l
vienres pela tarde, van ser cinco les actividaes a desarrollar. Depués de la
presentación d’estes xornaes, que va tener llugar a les 17.30, va facese una conferencia
de Ramón d’Andrés, Xefe de la Oficina de Política Llingüística col títulu de “A
recuperación dos nomes dos sitos y a Xunta de Toponimia del Principao”. A les
19 habrá  una comunicación de María Luisa López Diz, filóloga esperta en
toponimia, “Como se recoyeron os nomes dos sitos de Grandas de Salime” y darréu
d’ello otra de Xesús Pacios, esperto na cultura popular d’Ibias, “A toponimia
del conceyo d’Ibias”. A les 19.40 la última comunicación de la tarde sedrá la
de José Manuel Pérez Fernández, xurista y profesor na Universidá d’Uviéu, “A
oficialización da toponimia y os sous efectos xurídicos”. Esta primer sesión va
finar con una mesa redonda titulada “Os conceyos y a recuperación dos nomes
tradicionales dos sitos” y que va contar cola participación de los alcaldes o
representantes de los conceyos del Eo-Navia comprometíos col procesu.

La sesión del sábadu va abrila a les
11 de la mañana la conferencia de
Xosé Miguel Suárez, filólogu, historiador y espertu na toponimia del Eo-Navia
“A toponimia del Eo-Navia: el sou uso popular y a súa recuperación”. Una hora
más tarde sedrá la comunicación “Como se recoyen os nomes tradicionales dos
sitos” de Fernando Álvarez-Balbuena, filólogu y miembru de la Xunta Asesora de
Toponimia. Darréu Fredo de Carbexe, xeógrafu y espertu en desarrollu local va
falar de “Toponimia, identidá cultural y desarrollo rural”. Finalmente a la una
habrá una mesa redonda cola participación de representantes d’Asociaciones
Culturales y que va llevar por títulu “A recuperación dos nomes dos nosos sitos
y a súa aceptación social”.

Tolos actos van celebrase nel
Salón de sesióis del Conceyo del Franco, en A Caridá y la entrada ye llibre.