Homenaxe al creador de "Cuentos en Dialecto Leonés"

El pasáu sábadu 22 d'avientu, féxose na Casa de Cultura de Carrizo de la Ribera, na provincia de Llión, un homenaxe al escritor orixinariu del llugar Caitano Álvarez Bardón con motivu del centenariu de la publicación de la so obra: "Cuentos en Dialecto Leonés" primer obra publicada en llingua asturllionesa na provincia de Llión en dómina moderna. La obra d'esti autor sirvió como fonte pa los estudios del conocíu filólogu y historiador Ramón Menéndez Pidal y suponen un retratu de la sociedá rural llionesa, y en concretu de la Ribera del Órbigu, de va agora cien años.

El filólogu y llingüista Héctor Xil dio la charra "Caitano Álvarez Bardón y la llingua asturllionesa"nesti actu nel que se proyectó un documental sobre la llingua asturllionesa en Llión "Asina falamos" d'Emilio Gancedo y Tomás Martínez y nel que se fexo llectura y dramatización de dalguna de les obres del autor. L'homenaxe entamolu l'asociación Facendera pola Llingua contando col encontu del Ayuntamientu de Carrizo de la Ribera.