Homenaxe a los presos asturianos en Galicia

Una fábrica nel pueblu gallegu de
Rianxo foi la cárcele pela que pasaron más de mil presos
asturianos ente los años 1937 y 1939, tres de la caida del frente norte
na Guerra Civil. Anque había xente d'otros llugares, cásique'l
99% de los presos d'aquella cárcele improvisada, onde pasaron tortura y
necesidá y dellos morrieron de fame, fríu y calamidaes en Rianxo,
yeren asturianos, y ellí tan enterraos nuna fosa común. Asina conseña'l
rexistru civil de Rianxo los nomes d'Anselmo Borbolla Cabezas, Antonio Ojeda
Otero, Narciso Pendás García, Julio Tresguerres Bravo,
José Bravo Feito, Oscar Menéndez Menéndez y Andrés
de la Torre Fernández, los siete asturianos que yá nunca nun
salieron de Rianxo. La memoria popular diz que de nun ser pola
solidariedá de la xente del pueblu, los muertos sedríen munchos
más, y ye que los habitantes de Rianxo apañáronse p'ayudar
como pudieron a los presos, pasándo-yos comida y hasta
llimpiándo-yos la ropa que-yos daben enlleno pioyos.



Rianxo nun foi l'únicu presidiu gallegu atacáu de presos
asturianos. Según Marcelo Laruelo, Ribadeo, Betanzos, Cedeira, Muros,
Pobla de Caramiñal, Santiago, Figueirido, Illa de San Simón,
Camposancos, Santa María de Oia y Celanova tamién acoyeron
más d'estos campos de presos, pero ello ye que setenta años
depués, el conceyu de Rianxo foi'l primeru en facer reconocimientu
oficial n'alcordanza d'ellos. Asina, l'Ayuntamientu de Rianxo
organizó el fin de selmana del 17 y 18 d'ochobre unos actos "en
lembranza dos prisioneiros republicanos en Rianxo" qu'incluyíen
la presentación de dos llibros sobre estos socesos y tamién una
charra na que participó José Enrique Llera un vecín de
Colunga superviviente del campu. N'alcordanza de los que morrieron en Rianxo,
púnxose una placa en cementeriu que cola inscripción"terra
da nossa terra" quier remembrar que los muertos nel campu son yá
fíos adoptivos de Rianxo, como esplicó l'alcalde de Rianxo Pedro
Piñeiro Hermida .



Una delegación asturiana al cargu del Atenéu obreru de
Xixón acudió a los actos n'homenaxe a estos presos republicanos.
La intención de la entidá que dirixe Luis Pascual yera llevar
amás dalgún mensaxe o aval de les instituciones asturianes, pero
la Xunta Xeneral del Principáu nun quixo apuntase a la iniciativa. Na imaxe, el director del Atenéu Obreru de Xixón nel actu públicu nel campu de concentración (Semeya de Luis Timón)