"Higiénico Papel" lleva a La Felguera la obra d'Adolfo Camilo Díaz Puntu y Coma

Esti martes 19 d'avientu a les 20:15 hores represéntase nel Nuevu Teatru La Felguera la obra Puntu y Coma. Cola interpretación de Silvino Torre y la direición de Laura Iglesias, Higiénico Papel Teatru pon n'escena la obra Puntu y Coma d'Adolfo Camilo Díaz. Ye esta una comedia negra qu'espeya momentos d'un costumismu actual y sorprendente del ganador del últimu premiu Alejandro Casona de Teatru, Adolfo Camilo Díaz.

Con un llinguaxe socarrón y claru trescurre la conversación de Cipriano, un caradura ensin perres que visita a so pa, un home de pueblu con un patrimoniu de casería, vaques y tierres; y que ta en coma nun cuartu d'un hospital.
A mou de confesión Cipriano fai, na so manera, un repasu pela rellación ente dambos y lo que fue la so vida desque abandonara la casa paterna. Na conversación apaez Chona, la que resulta ser amante de dambos, padre y fíu, y poco a poco va descubriéndose un enguedeyu nel que tolos personaxes qu'apaecen implicaos, (Chona, so ma, so tía, un auxiliar alministrativu) anden a la gueta la herencia del moribundu...