HC va facer una central supercrítica de carbón n'Aboño

El director de Proyectu y Inversiones de HC Energía, Marcos Antuña, anunció ayeri la presentación a trámite de competencia de concursu de la planta de ciclu combináu d'El Musel d'una central térmica de 865 MW, con dos grupos de xeneración eléctrica de 400 MW, con una inversión de 361,4 millones d'euros. Antuña adelantó que nel casu d'algamar la concesión n'El Musel, HC Energía diba utilizar el so espaciu disponible n'Aboño pa construir una tercer central supercrítica de carbón col horizonte marcáu nel 2015.

Too ello diba xenerar una potencia, nel 2015, de 2.100 MW, lo que tornaría a la compañía asturiana na de mayor xeneración eléctrica n'Asturies con diferiencia. Sobre'l proyectu portuariu, concretó que ta previsto un plazu de 21 meses pa la tramitación , colo que les obres de construcción diben entamar en setiembre del 2009, con una duración de 24 meses. La obra diba tar condicionada pola entrada en funcionamientu de la regasificadora que se va construir na ampliación portuaria, la empresa concesionaria de la cual, Enagás, prevé poner en marcha n'avientu del 2010.

Antuña destacó como ventaya del diseñu de HC, que compite pola concesión con Endesa, nuna menor ocupación de los terrenos, 6,8 de 7,9 hectárees disponibles, colo que quedaríen unos 9.000 metros cuadraos d'espaciu llibre, del que pue disponer l'Autoridá Portuaria de Xixón pa otros usos.


Tamién destacó la utilización d'un circuitu peslláu de refrixeración d'agua de mar, respecto a ún abiertu, con un caudal de toma y vertío d'agua 37 y 47,5 veces menor que'l segundu respectivamente, asina como un impactu térmicu del vertíu nel mediu acuáticu 40 veces menor. Amás, van usase torres de refixeración de tiru mecánicu y híbridu, de manera que s'amenorgue l'impactu visual.

De la mesma manera, señaló que'l suministru de gas ta garantizáu. En cuantes a la evacuación, va ser necesario construir una llinia enterrada de 2,2 kilómetros pa la evacuación de 400 Kw y ampliar la subestación existente de Carrió a 400 Kw. Tamién va ampliase la capacidá de tresformación del exe Pumarín-Tanes de 132 a 400 kw, con una conexón cola linia d'alta tesión Sama-Velilla, que va ser de 400 kw, de manera que se puea evacuar a la Meseta. Respecto a la evacuación xeneral n'Asturies, al marxe d'esta llinia d'alta tensión va facese usu de la de Soto-Penagos, de 400 kw.

En cuantes a xeneración d'emplegu, ta prevista la contratación directa de 65 persones, y ente 70 y 100 más d'emplegu indirectu. na fase de construcción, cuéntase con llegar a los 600 trabayadores.
Na rueda prensa tuvo presente tamién el director xeneral de Corporativa y Comercial de Hc Energía, Javier Sáenz de Jubra, quien apuntó que nun considera una desventaxa'l ser una empresa asturiana, pese a que reconoció que-y preocupa que l'Alministración puea avalar el proyectu d'Endesa pa El Musel.