Gutiérrez solicita al ministru Urtasun que los creadores n’asturianu puedan optar a premios y ayudes de Cultura

“Escrita en cualquiera de las lenguas oficiales españolas” ye un testu que se repite en munches de les convocatories del Ministeriu de Cultura, dexando asina fuera a los creadores n’asturianu. La viceconseyera Ana Vanessa Gutiérrez solicitó al ministru nuevu del ramu, Ernest Urtasun, que tamién los tenga en cuenta p’acceder a premios o ayudes magar la falta d’oficialidá del idioma.

Foi ayeri en Madrid, onde se desplazó la responsable de Cultura, Política Llingüística y Deporte pa participar na xunta del Patronatu de la Fundación Selgas na sede de la organización. Una aconceyamientu col ministru de Sumar na que se trataron delles cuestiones llingüístiques, ente otros asuntos.

Gutiérrez treslladó a Urtasun que, como asocede con otres iniciatives del propiu Ministeriu de Cultura, tenga en cuenta na convocatoria de premios y ayudes al asturianu como una llingua más magar la falta d’oficialidá, l’encaxe llegal que marca la Constitución pa los diferentes idiomes del Estáu, D’esta forma, los creadores n’asturianu, reconocíu xurídicamente pol Estatutu d’Autonomía, dexaríen esta situación de marxinación con respeuto a compañeros d’otres autonomíes billingües.

D’igual forma, magar que nun dependa del so departamentu, solicitó al ministru un mayor sofitu a l’Academia de la Llingua Asturiana (ALLA) y que’l PERTE de la Lengua incluya al asturianu y al gallego-asturiano.

Otros temes

La viceconseyera tamién aprovechó la reunión pa pidir ayudes más importantes pa la Fundación Ópera de Oviedo y pa poder siguir nel llabor de rehabilitación del patrimoniu cultural asturianu, como ye’l casu del arte prerrománicu o del Pozu Santa Bárbara. Depués del conceyu, el catalán espublizó na rede social X una semeya del mesmu y el testu "la cultura ha ser, na so diversidá de llingües, espresiones y patrimonios, un elementu de vertebración del territoriu", y dio les gracies a Gutiérrez "por abrir llinies de collaboración de l'Alministración autonómica col nuesu ministeriu".