Guti presenta'l so discu

Na mañana del vienres el gaiteru "Guti" presentó nos locales de la Sociedá Xeneral d'Autores el so discu "Gaiteru del sur".

Xune Elipe en representación de la discográfica "L'Agüañaz", Javier Vidal delegáu p'Asturies de la SGAE y el propiu José Manuel Fernández fueron los encargaos de presentar a la prensa'l nuevu trabayu del gaiteru. Xune Elipe destacó qu'esti nuevu discu afonda na llinia de rupturista que vien siguiendo la so discográfica d'un tiempu p'acá, espublizando discos que nun siguen coles llinies tradicionales qu'había nel mundu de la música asturiana. Pola so parte'l gaiteru agradeció la collaboración de tolos músicos que participaron nel discu a los cuálos denominó como los meyores músicos asturianos. Tamién anunció que van ponese en breve a preparar el directu, que va contar colos mesmos músicos que nel discu, ya que ya tienen alrededor de seyes feches cerraes.

Per otru llau dende Asturies.com quiximos saber cuála yera la opinión de la SGAE sobre les declaraciones feches pol director de la Selmana Negra de Xixón nes que declaraba al recintu del eventu espaciu "llibre" pa los vendedores de cd's "pirates", y acusaba a la SGAE de dir contra la parte más feble de la cadena, que nesti casu son los vendedores finales de los cd's. En rellación a esto Javier Vidal declaró a esti diariu que nun entraba a valorar la cuestión del espaciu llibre pa los vendedores na selmana negra, y qu'habría que ver si eses declaraciones nun sedríen constitutives de delitu, cuestión que la SGAE ta plantegándose ente la posibilidá de ponder una denuncia al director de la Selmana Negra. No que cinca a la otra cuestión, declaró que yeren conscientes de que "l'inmigrante" yera la parte más feble, pero qu'eso nun yera escusa pa dexalu cometer un delitu.