Guieldu y Alienda tán ente los diez seleicionaos del Runas d'Ortigueira

|
Guieldu y Alienda

La votación na rede del públicu pa escoyer a los sos favoritos pa tocar nel festival gallegu de música de raigañu celta, que se celebra del 9 al 16 de xunetu, fina'l vienres a les 14 hores.

La segunda fase del concursu Runas de valores nuevos qu'entama'l Festival Internacional do Mundo Celta de Ortigueira cuenta con dos grupos asturianos ente los diez que pasaron el corte. Son Guieldu y Alienda, qu'aspiren a ser ún de los trés seleicionaos pa participar na final que tien llugar nel propiu certame, una actuación de 40 minutos con un caché de 1.500 euros, IVA incluyíu.

El vienres a les 14 hores fina'l plazu d'una votación na que Guieldu va en segunda posición con un 20 por cientu de los cuasi 15.000 votos emitíos hasta'l momentu, un total 3.305 cuando se redautó esta información. El líder ye'l madrilanu d'orixe gallegu Ramalleira, con un 25 por cientu (4.122), y el terceru'l grupu folk ferrolanu Lenda Ártabra, con un 12 por cientu (1.915).

Nun anda mui lloñe Alienda, en quinta posición, con un 10 por cientu (1.564 votos), mesmu porcentaxe que los aragoneses Muro Kvartet (1.709). Completen el llistáu, nesti orde, el catalán Ros, los gallegos Mediarea, los escoceses Clann an Drumma, los andaluces Darash y los tamién gallegos Sons of Exodus.

El Festival Internacional do Mundo Celta de Ortigueira tien habilitada un páxina web pa sentir cantares de los grupos participantes xunto con un dossier y poder votar. P'acceder a ella pue calcar equí.

Ún de los cinco votos

El votu popular va sumase a los de los cuatro miembros del xuráu del premiu. Caún va puntuar del 10 al 1, siendo los 10 pal meyor valoráu –más votáu nel casu del públicu– y 1 pal que menos-yos guste, y los trés qu'al final tengan meyores númberos van ser los finalistes del Runas.

Éstos van anunciase los díes 24, 25 y 26. El ganador nel marcu del festival va llevar como premiu un contratu pa la edición del 2024 con un caché de 3.000 euros, más IVA.

Nes imáxenes, Guieldu y Alienda.

 

Contador Estadistiques