Gonzali anuncia unes xornaes lliteraries que van mirar “a la mar, la gastronomía y la música”

El salón de recepciones del Conceyu de Xixón acoyó la presentación de les Xornaes Lliteraries nel Arcu Atlánticu. El so coordinador, Humberto Gonzali, anunció qu’éstes van mirar “a la mar, la gastronomía y la música”.
 
El Festival Arcu Atlánticu apura los sos díes últimos enantes de la inauguración oficial, prevista pal sábadu nel Teatru Xovellanos, y güei tuvo llugar la presentación de la estaya lliteraria d’esti certame impulsáu por Foro Asturias Ciudadano al traviés de la figura del conceyal d’Educación, Cultura, Mocedá y Festexos, Carlos Rubiera, tomando como espeyu’l Festival Interceltique de Lorient/An Oriant. L’edil asturianista foi la persona encargada d’abrir les intervenciones destacando la intención del so equipu de convertir a Xixón “na ponte que coneute tol noroeste peninsular colos países ribereños del Atlánticu”.
 
Darréu, Gonzali esplicó toles actividaes entamaes pola Asociación Cultural L’Arribada dende’l llunes hasta’l vienres 27, de manera principal nel Centu de Cultura Antiguu Institutu, y nes que la cultura portuguesa, como país convidáu nesta primer edición del Festival Arcu Atlánticu, va tener un protagonismu especial. Asina, ta previsto la emisión d’un documental sobre Portugal (martes, 13 hores) y una conferencia a cargu d’Antón García sobre la ‘Memoria asturiana d’Eugenio de Andrade’ (martes, 17 hores), poeta portugués con una influencia importante nel Surdimientu. Tamién va haber presentaciones de llibros como ‘Vento meu no Brasil 500’ (martes, 17.30 hores), de José Pedro Katzenstein, obra na que rellata la so travesía pol Atlánticu repetiendo la ruta del esplorador Pedro Álvares Cabral; ‘Portugal, país, posada y paraíso’ (martes, 18 hores), d’Ángel García Prieto; ‘A poesía é para comer’ (martes, 18.30 hores), d’Ana Vidal; y ‘Sem título’ (martes, 19 hores), de João Alfonso Machado. Esi mesmu día, a les 19.30 hores, Daniel Gouviea va falar sobre la rellación ente’l fado y la lliteratura.
 
Amás, Gonzali destacó que pa la inauguración de la xornaes, el llunes a les 17 hores, ta prevista una salida a la mar con tolos autores convidaos, al igual que fai L’Arribada cola so actividá setembrina Vagamar, y que pal so pieslle va celebrase un alcuentru poéticu nel Xardín Botánicu Atlánticu (vienres, 12 hores) nel que van participar los rapsodas vascos Javier Arnaiz, María Ángeles Pérez Ondiviela, Santiago Liberal y Carmen Martínez, xunto a los poetes asturianos en llingua asturiana Lurdes Álvarez, Miguel Allende y Esther Prieto, y, en castellanu, Juan Acebal. Ente medies tamién va haber sitiu pa la cultura asturiana.
 
Pela so parte, María Xosé Rodríguez, responsable de la Oficina de Normalización Llingüística, anunció la participación d’esti organismu dientro de les actividaes lliteraries del Festival Arcu Atlánticu con una esposición de materiales lliterarios y divulgativos fechos por esti serviciu de normalización y polos d’otros conceyos del país nuna carpa instalada nel paséu de la playa d’El Natahoyo. “La intención ye mostrar, tanto a la xente d’Asturies como a la de fuera, una de les señes d’identidá cultural más importante del nuesu patrimoniu, que nun debemos escaecer”, esplica Rodríguez. Xunto a la esposición de materiales, los visitantes van poder conocer los trabayos fechos los escolinos y escolines de la ciudá sobre Xosefa Xovellanos. Por último, Rodríguez fixo referencia a les ocho guíes de llectures espublizaes pola Rede Municipal de Biblioteques sobre temática atlántica dedicaes a Éire, Alba, Inglaterra, la Francia atlántica, País Vascu, Asturies, Galicia y Portugal, que se pueden consultar na web municipal.
 
Un espectáculu especial pa la presentación
 
Pa zarrar l’actu, Rubiera convidó a tolos xixoneses y visitantes a presenciar la inauguración oficial del Festival Arcu Atlánticu, prevista pal sábadu a les 20.30 hores nel Xovellanos. En primer llugar, va actuar la Orquesta Sinfónica y el el Coro de Voces Blancas del Conservatorio Profesional de Música de Xixón, pa depués dar pasu a Gueta na Fonte y a la Orquesta Céltica Asturiana. El preciu de la entrada ye de 10 euros.