Gobiernu y sindicatos contradícense sobre'l resultáu de la fuelga na enseñanza

El Gobiernu asturianu y los sindicatos d'enseñanza que convocaben una fuelga en protesta contra la propuesta de carrera docente fecha dende l'alministración asturiana emitieron ayeri datos contradictorios sobre l'éxitu de la convocatoria de paru, que sofitaben les centrales CCOO, SUATEA y CSI-CSIF. Asina, dende'l Gobiernu peritóse'l siguimientu nun 3,26% mientres que les entidaes organizadores del paru calificáronlu de "masivu" y declararon que na manifestación qu'anduvo pel centru d'Uviéu esixendo la retirada del proyectu de carrera docente y n'asamblea que se fexo nel IES Aramo pa discutir d'ello hebo miles de persones de toa Asturies.

La Conseyería d'Educación defende'l proyectu de Carrera Docente asegurando que más de 1.500 docentes de los 5.000 que tienen los 5 años d'antigüedá precisos pa ello pidieron yá acoyese a esti modelu. El xefe de personal del Principáu Arturo Verano avisó que los firmantes del modelu van recibir por adelantao la cantidá que-yos correspondería cobrar nel añu 2007, un suplementu d'ente 800 y 1.600 euros acordies coles situaciones de caún.

Viendo la situación a la inversa, la sindicalista de SUATEA Beatriz Quirós aseguró qu'eses 1.500 firmes son poques y qu'espeyen el pocu interés de los mayestros asturianos n'adaptase al modelu de carrera profesional, que dende SUATEA, CCOO y CSIF considérase un "cheque en blanco" que condiciona'l cobru de complementos salariales al pasu per una evaluación pa la que nun hai criterios acutaos y que compromete al profesor a devolver el dineru que cobrare en casu de nun pasar esa evaluación. Tolos sindicatos d'enseñanza sacante FETE-UXT esixen la retirada del modelu de carrera profesional y que'l presupuestu acutáu pa la xuba de salarios de los docentes se reparta ente tolos profesores y non ente los que firmen la propuesta.