Gaspar Llamazares defendió'l votu a IX-BA-LV como'l "votu útil de la izquierda"

Izquierda Xunida - Bloque por Asturies - Los Verdes celebró ayeri en Xixón el so actu central de campaña pa les elecciones autonómiques asturianes, un mitin que contó con más de 1.000 asistentes y cola participación del candidatu a la presidencia d'Asturies Jesús Iglesias, el candidatu a alcalde de Xixón Jesús Montes Estrada, el representante de Bloque por Asturies Rafael Palacios, el de los Verdes Nacho González y del Coordinador Xeneral d'IX Gaspar llamazares, que definió'l votu a esta opción política como "el votu más útil de la izquierda" en cuantes que supón la garantía de "más participación democrática, más defensa del mediu ambiente y de los servicios públicos".

Pela so parte, Jesús Iglesias enfotóse nes posibilidaes electorales de la so formación, negando que los socialistes tuvieren raspiando la mayoría absoluta. Pa Iglesias, la FSA taría "al borde d'un ataque de nervios" porque "saben que nun tienen esa garantía" y que polo tanto "La única fórmula de gobiernu incluye a IX-BA-LV". Iglesias definió la campaña del so partíu como "posada, esplicativa y racional" y defendió la opción d'IX-BA-LV como "fuerza política que meyor pue resolver los problemes d'esta tierra" contra la "carrera demagóxica del PP y del PSOE". Y esixó-yos al restu de fuerces polítiques qu'espliquen cómo piensen cumplir les sos promeses cuando saben que son inviables", dfendiendo la puesta en marcha de midíes como'l
salariu social, la Llei de Dependencia, la construcción de viviendes de promoción pública o les polítiques de cooperación internacional entamaes na llexislatura qu'acaba como la prueba de la so capacidá .


Les midíes pal retornu de la emigración moza y la necesidá de la entrada de la oficialidá de la llingua asturiana na reforma del estatutu d'autonomía tamién apaecieron nel discursu d'Iglesias. El representante del Bloque por Asturies, Rafael Palacios sorrayó tamién estes cuestiones y definió les campañes electorales del PSOE y del PP como "faltes de respetu a los asturianos. Palacios cargó contra'l delegáu del gobiernu Antonio Trevín, calificándolu de "represor" en referencia a los casos de sanciones na protesta ecoloxista en Caliao o los castigos a los sindicalistes Cándido y Morala, amás de contra los candidatos del PP y del PSOE, defendiendo'l votu a IX-BA-LV como'l votu "contra l'absolutismu y la prepotencia y el votu pola ciudadanía, la cultura y la llingua asturiana".

Nacho González, de Los Verdes, defendió'l discursu de la so formación en cuantes que trata de les "polítiques de lo cercano" sorrayando nel so discursu la necesidá de defender l'accesu a la vivienda "cuando hai tantes cases vacies" y la importancia de l'agricultura y la política ecolóxiques "contra l'actual modelu enerxéticu y la política del hormigón".