García Oliva gana’l premiu d’ensayu “Máximo Fuertes Acevedo”

L'escritor Vicente García Oliva ye’l ganador de la decimosesta edición del Premiu d'ensayu en llingua asturiana “Máximo Fuertes Acevedo”, que concede la Conseyería de Cultura y Turismu del Principáu d'Asturies.

Ente les obres presentaes, el xuráu decidió conceder el Premiu al testu tituláu “El síndrome de Sherezade”, destacando que se trata d'una obra que, con bon estilu narrativu, analiza la necesidá antropolóxica de cuntar hestories y les funciones de los mitos y cuentos populares, con una consideranza especial de la sociedá actual y de la cosmovisión asturiana.

El xuráu que concedió esti galardón taba formáu pola Directora Xeneral de Política Llingüística, Consuelo Vega Díaz, y los escritores y investigadores Xulio Arbesú, ganador de la edición anterior del premiu; Elena de Lorenzo Álvarez, profesora de Lliteratura de la Universidá d'Uviéu; y Xosé Antón Suárez Ponte, profesor de Bioloxía Molecular de la Universidá d'Uviéu. El premiu ta dotáu con 7.000 euros.

La decisión del Xuráu foi adoptada por unanimidá y tres un alderique final nel que s'envaloró de mou especial l'ensayu “Lliteratura y máscares”, que resultó finalista del certame.

Trayectoria del autor
Vicente García Oliva (Xixón, 1944) ye miembru de númberu de l'Academia de la Llingua Asturiana. Tien una ventena de llibros publicaos n'asturianu y castellán, nos que cultiva tantu la lliteratura infantil como la novela policiaca o l'ensayu.

Ye tamién ganador de diversos premios lliterarios: el Premiu “Llectures pa rapazos”, de l'Academia de la Llingua Asturiana; el Premiu “Montesín”, de la Editorial Trabe; y el Premiu de la Crítica d'Asturies, ente otros.