Galicia recupera la enciclopedia de Silverio Cañada

Nel añu 1970, l'históricu editor asturianu Silverio Cañada, responsable de que vieren la imprenta bien de testos comprometíos en tiempu de la dictadura, entamó la obra de consulta definitiva de consulta sobre'l nuestru país. Taba acabante nacer la Gran Enciclopedia Asturiana, que d'aquella axuntó na so redacción a los mayores espertos en cada estaya de la investigación y divulgación pa facer dos obres de consulta imprescindibles y que tuvieron un aceptable rendimientu en cuantes qu'empresa editorial. En 1974, Cañada entamó otru proyectu paralelu cola creación de la Gran Enciclopedia Gallega, que brilló al mesmu altor que la so hermana astur. Si pela parte asturiana collaboraron nomes como Chano Castañón, Gonzalo Sancho, Xosé Lluis García Arias, pela parte gallega andecharon ente otros Álvaro Cunqueiro, Otero Pedrayo o Ramón Fraguas

Trenta años depués, la Gran Enciclopedia Asturiana sobrevive malamente. Tres de la muerte de Cañada, que llegó a plantegar la creación d'una Gran Enciclopedia d'Aragón que nun llegó a realizase, la editorial sigue venducando los tomos de la enciclopedia, que, anque sigue calteniéndose a lo llargo d'estos años como la obra más completa sobre Asturies qu'enxamás s'editare, nun son namás que reimpresiones socesives de los orixinales de los 70 a los que foron amestándose colos años suplementos qu'actualizaben los conteníos colos socesos más de recién.

Con too y con ello, la falta d'un enfotu claru por remocicar la obra y ponela al día contrasten cola evolución de la so hermana, la Gran Enciclopedia Gallega, que ta pa entamar unanueva etapa. Ello ye que'l grupu El Progreso ta pa poner a la venta esta mesma selmana la versión nueva de la enciclopedia, qu'amás d'actualizar conteníos, semeyes y grafismos, vio como se tornaben enteros dafechu al gallegu los sos 25 volumes. Ello foi asina gracies al llabor d'un equipu d'especialistes grandísimu y que tien al frente a un Conseyu Editorial nel que figueren ente otros munchos los nomes de Fernando González Laxe, Darío Villanueva o Antonio Bonet Correa.