Gabino tomó-y la pallabra a la pita de la Xunta

El Conseyu de Mocedá d'Uviéu (CMU) presentó ayeri en rueda de prensa los conteníos de la campaña de normalización que la entidá va entamar a desarrollar. Nel actu, el conceyal de mocedá Gerardo Antuña, adelantó que l'Ayuntamientu d'Uviéu yá se punxo en contactu cola Academia de la Llingua pa estudiar midíes de normalización y espardimientu del asturianu en conceyu, faciendo referencia al estudiu de la toponimia del conceyu y a la posible organización d'un premiu lliterariu

L'anuncia de Gerardo Antuña, que tamién dio anuncia de que los materiales del programa "La nueche ye tuya" van editase en billingüe, sorprendió a tolos asistentes al actu de presentación de la nueva campaña de normalización del CMU, y supón el cumplimientu, o a lo menos la voluntá de cumplir, cola palabra que-y diere l'alcalde Gabino de Lorenzo a la pita de la Xunta Pola Defensa de la Llingua el 15 d'avientu nel trescursu d'una concentración de la organización cívica con motivu del congresu del sindicatu CCOO, acontecimientu al qu'asistió l'alcalde carbayón. Naquella ocasión, De Lorenzo salió del congresu al enterase de la presencia de la pita nel esterior del auditoriu "Príncipe Felipe" y foi pa contra los manifestantes pa da-yos anuncia de que quería entamar midíes de normalización n'Uviéu.

D'otra manera, la campaña que se presentó ayeri nel CMU nun actu al que tamién asistió Ramón d'Andrés, que faló de la importancia de caltener l'asturianu ente la mocedá a la lluz de los datos del estudiu de Llera Ramo, céntrase na mocedá d'Uviéu como públicu específicu y ta compuesta por calandarios y cartelos que van tar d'equí a poco nes cais de la ciudá.

La campaña faise gracies al sofitu de la Conseyería de Cultura del Principáu d'Asturies y cuenta tamién col sofitu del Conceyu d'Uviéu, que va poner al serviciu de la mesma dellos encontos de propaganda "mupis" nos qu'asitiar los carteles. Según Xabel llano, presidente del CMU, "trátase de sorrayar la importancia de la llingua asturiana como elementu y preséu de futuru p'Asturies"

Nel testu de presentación de la campaña faise referencia a la importancia de la llingua asturiana como la mayor de les aportaciones que'l pueblu asturianu fai a la cultura universal. La campaña nun escaez tampoco la crisis que sofre Asturies en tolos niveles, rematando cola frase "Defendi'l futuru d'Asturies. Defendi l'asturianu" y cola entruga a la mocedá "¿Qué Asturies quies tu?" cola qu'el CMU quier facer participes a tolos mozos y moces d'Uviéu de la mesma.