FSA y IX-BA manifiesten la so voluntá de llegar xuntos a final de llexislatura

Dempués d'una reunión de más d'ocho hores, les fuerces que tienen pol gobiernu asturianu ficieron un balance en positivo de los trés años que se lleven d'un gobiernu de coalición que s'enfrenta agora a los sos últimos 12 meses de llabor. El balance oficial ye positivu y nel documentu fálase d'un altu nivel de cumplimientu y la bona marcha del alcuerdu en toles árees del Pautu" comprometiéndose a rematar nel tiempu que queda los aspectos por desarrollar.

El balance oficial aparca toles rocees de los últimos meses ente les fuerces de gobiernu y defende que'l pautu de gobiernu significó un periodu d'estabilidá política, sorrayando toles partes del acuerdu, dende la FSA al Bloque por Asturies, que trés fuerces con cultures polítiques tan distintes llograren ser capaces de sentase a negociar y gobernar. El presidente Areces, pela so parte, espeyó'l compromisu de caltener hasta'l final el pautu de gobiernu.

El documentu de conclusiones pautáu poles trés fuerces asitia la Llei de Derechos y Deberes de los usuarios de la Sanidá y la tresformación del Centru de Tresfusiones nún ente públicu como los oxetivos por cumplir más importantes xunto col plan de Vivienda 2006-2008 y el desarrollu del plan d'inclusión social, el catálogu de prestaciones o'l reglamentu del salariu social. Nel capítulu mediuambiental, la revisión del PORNA y la Llei de Prevención y Intervención Ambiental son dellos de los puntos que más rescamplen, comprometiéndose tamién el documentu a desarrollar en tolos sos puntos el Plan de Normalización Social del asturianu.

El coordinador d'IX, Jesús Iglesias foi la voz más crítica no tocante al grau de cumplimientu del alcuerdu de gobiernu, lo mesmo que sorrayó que la crisis provocada pol nomamientu de María Antonia Fernández Felgueroso como procuradora xeneral franció la esistencia d'un puntu d'alcuentru ente les fuerces de gobiernu. Javier Fernández, de la FSA, sorrayó sobre esi puntu que l'alcuerdu de gobiernu incluyía la creación del cargu pero non el nomamientu del so titular.

El procesu de reforma del Estatutu d'Autonomía, que nun entraba lóxicamente na valoración de los trés años de gobiernu, sí apaeció na rueda de prensa, asegurando tolos presentes que taben d'alcuerdu en que s'entamare y faciendo un llamáu al PP pa que participe del procesu.