FSA-PSOE y IX aconceyen esti xueves pa “tomar una decisión”

La Xunta Xeneral va ser sede d’un aconceyamientu nuevu de FSA-PSOE y IX cola intención de “tomar una decisión” sobre l’apoyu de la coalición na investidura. Militantes y cargos d’IX acusen a la direición del partíu de nun tenelos en cuenta.
 
Los conteníos políticos analizaos hasta’l momentu poles dos formaciones son la necesidá d’un alcuerdu de concertación social p’Asturies; el compromisu col estáu del bienestar; la defensa de la sanidá, la educación pública y les prestaciones sociales; asina como l’adopción de midíes de tresparencia nes alministraciones públiques, amás de la pluralidá na composición de los órganos de la Xunta Xeneral. L’alcuentru va celebrase a partir de les 17 hores na sede del Parllamentu y nél namái va tratase la culminación d’un alcuerdu d’investidura. Sicasí, dende IX apunten que dambes formaciones nun descarten, una vegada constituyíu’l Gobiernu, se siga esplorando la posibilidá d’algamar acuerdos puntuales, de llexislatura o de participación nel Executivu.
 
Mentes la direición d’IX negocia col PSOE, les bases y dellos cargos de la coalición llanzaron una acusación contra los sos cabezaleros por “nun contar” colos órganos de la organización nin cola afiliación de cara a los alcuentros colos socialistes. L’alcaldesa de Castrillón, Ángela Vallina, y el secretariu d’Industria de CC OO y militante d’IX, Maximino García, voceros de la corriente crítica 'Voces para el Cambio', na que s’integren unos 80 afiliados, fixeron esta denuncia ayeri. "Les decisiones importantes tomáronles ensin contar con la mayoría de la afiliación", señaló Vallina, que darréu entrugóse "¿cuántos de nosotros participamos na configuración de les candidatures o nos alcuerdos de Gobiernu?”.
 
Al respeutu d’esti puntu últimu, l’alcadesa mostróse direuta: "yo formo parte de la presidencia y del conseyu políticu, y dende’l 25 de marzo –fecha de les eleiciones– nun se nos convocó; tamos lleendo nel periódicu declaraciones sobre cómo van les negociaciones y nun sabemos de qué". Sobre la postura d’esta corriente por un pautu posible col PSOE, García señaló que "siempre qu’esistan posibilidaes d’impedir que la derecha gobierne, debemos d’intentalo, pero tamos demandando claramente en qué conceutu". "Hai que falar de reunión d’órganos de direición y participación de la afiliación", añadió, para darréu esixir "participar en cómo frenar a la derecha".