Foro de Ciudadanos recurre al TSXA la decisión de la Xunta Eleutoral de validar el votu emigrante

La Comisión Direutiva de Foro de Ciudadanos decidió esti miércoles presentar un recursu al TSXA pola decisión de la Xunta Eleutoral de validar el votu emigrante del 25-M. Considera qu’hubo una irregularidá na recepción de sufraxos.
 
El partíu de Francisco Álvarez-Cascos aprobó güei poner un recursu contencioso-eleutoral previstu n'artículu 109 Loreg, asina como, nel so casu, recursu d'amparu ante'l Tribunal Constitucional, frente al acta de la Xunta Eleutoral d'Asturies de proclamación de candidatos eleutos. El motivu d'impugnación básase en que l'artículu 75 de la Llei Orgánica 5/1985, de 19 de xunu, del Réxime Eleutoral Xeneral, na redaición dada pola Llei Orgánica 2/2011, de 28 de xineru, regula de forma minuciosa'l procedimientu de votu de los residentes ausentes, estableciendo que, en casu d'exercese per corréu'l derechu de votu, la so remisión ha realizase al traviés de la Oficina Consular. Nes eleiciones a la Xunta Xeneral 332 sufraxos nun llegaron por esta vía, sinón per corréu, votos que s’amestaron colos otros de la emigración a la hora d’un recuentu que terminó dando un diputáu más al PSOE pol occidente en detrimentu de Foro.
 
Pa esta formación, "la irregularidá cometida, entemeciendo'l votu recibíu directamente pola Xunta Eleutoral col unviáu al traviés de les delegaciones consulares y diplomátiques, ye d'una trescendencia esceicional, yá que supón una torga na determinación de la verdá material del resultáu eleutoral, polo que causa una situación de rocea no referente a la determinación de cuál yera'l sentíu del votu d'un númberu eleváu de papeletes". El criteriu defendíu por Foro apóyase nel votu particular formuláu por Juan José González Rivas, maxistráu de la sala de lo Contencioso-Alministrativu del Tribunal Supremu y miembru de la Xunta Eleutoral Central, qu'entiende que'l votu del Censu de Residentes Ausentes (CERA) unviáu direutamente a la Xunta Eleutoral incumple l'artículu 75 de la Loreg, y les garantíes coles que s'arrodió esti procedimientu de votación, atentando contra'l principiu de verdá material qu'ha presidir toa votación. Por ello, considera que tienen qu’anulase la totalidá de votu CERA al proceder de la Xunta Eleutoral, de manera indebida, a la mecigaya de votos
 
La respuesta, n’ocho o diez días
 
Ignacio Vidau, presidente del Tribunal Superior de Xusticia d’Asturies (TSXA), señaló tres conocese la decisión de Foro que nun son necesaries midíes cautelares pa la paralización de la formación del Parllamentu y que la decisión del órganu conoceráse n’ocho o diez díes al tratase d’una materia eleutoral.