Foro Asturias, dispuestu a eliminar el Serviciu de Normalización Llingüística del Cabu Peñes

El Serviciu de Normalización Llingüística y la Oficina de Consumu del Cabu Peñes peligren. Foro Asturias ta dispuestu a sacrificar estos dos servicios pa nun disolver asina la Mancomunidá, como pretende’l Partido Popular (PP).

Según informa güei’l diariu ‘La Nueva España’, mañana va tener llugar una reunión ente les dos formaciones de dereches en Gozón pa concretar una serie d’alcuerdos que podríen llevar a un pautu que dea estabilidá al gobiernu municipal. Una de les cuestiones más trescendentes ye l’aportación del Conceyu de Gozón a la Mancomunidá que, n’opinión de Foro ha de menguar, anque nun desapaecer. Pa ello plantega la eliminación de la Oficina de Consumu y del Serviciu de Normalización Llingüística, lo que sería un pasu atrás perimportante nes polítiques de normalización de Carreño y Gozón.

Pa la Xunta pola Defensa de la Llingua Asturiana (XDLA) “toda esta situación toma caráuter surrealista porque, no que se refier a la Oficina de Política Llingüística, ta financiada con cargu a la Direición Xeneral de Política Llingüística de la Conseyería d'Educación, Cultura y Deporte, colo que nun supón carga económica pa los citaos conceyos”. Por esti fechu, la organización cívica reclama “una rectificación inmediata d'estes maniobres per parte d'estos grupos políticos que nun puen esconder otro qu'intereses rancios y contrarios al exerciciu de polítiques de valoración y normalización del patrimoniu llingüísticu de los sos conceyos”.

Pela so parte, Iniciativa pol Asturianu recuerda a les dos formaciones polítiques “que’l Serviciu fináncialu’l Gobiernu d’Asturies al traviés d’unes sovenciones añales y que nun pue usase la sida del aforru como motivu pal pieslle d’esti SNL. Amás, los sos servicios suponen un valor añadíu pa los conceyos mancomunaos, pues l’usu del asturianu xenera un valir estra a productos y servicios d’empreses y otres entidaes, amás de sofitar el caltenimientu del idioma, un bien cultural y económicu, pa les futures xeneraciones”. Por último, solicita a la Mancomunidá del Cabu Peñes “que refuercien esti SNL y busquen una solución estable col Gobiernu d’Asturies, al traviés d’un conveniu que dea estabilidá al organismu, y nel que los conceyos de la Mancomunidá se comprometan daveres col procesu de normalización llingüística nos sos territorios”.