Formula 1

Fernando Alonso nun pudo volar peles ramples de Mónaco, pero amarró una quinta posición que dexa al carbayón en tercer posición d'un mundial pal que yá namás cuenten los nomes de Raikonen (McLaren Mercedes) y Schumacher (Ferrari) anque ayeri quedaren clisaos pola bona actuación de los Williams-BMW. Montoya ganó pa Williams la primer carrera d'esti añu, y, anque lleguen con retrasu, los bólidos angloalemanes puen guapamente ser árbitrios del mediu campeonatu que queda.

El fin de selmana nun pintó tolo bien que contaba pa la escudería Renault, y yá el xueves viose que los coches azules teníen problemes d'adaptación al circuitu, llamando l'atención el que foren los más rápidos na primer parte de la pista pa depués, na parte rápida, tener un baxón de rendimientu que los ponía a la cola del pelotón. Alonso acusó más que Trulli estos fallos, y el compañeru del asturianu afitose como ún de los más rápidos del mundu al facer el 4º meyor tiempu n'entrenos, mientres qu'Alonso namás pudo ser octavu. Los Williams-bmw, desconocíos, tomaben la primer fila y un discretu Schumacher quedaba 5º.

Con estos tiempos la carrera prometía emoción,pero lo igualao de les prestaciones de los coches y les estratexes quitáron-y color a un gran premiu que bien pudo ser muncho más espectacular. Los Williams salieron a trapu y con poca gasolina pa abrir furacu cuando llegare la parada en boxes. Per atrás, Alonso adelantaba dos puestos na salida con un esterior impecable y mangábase sestu, sufriendo pa siguir a Trulli y al Ferrari de Michael Schumacher, que diba embucháu ente los dos coches franceses. Alonso foi l'últimu de los grandes en facer la primer parada en boxes, y eso perxudicolu, baxando al octavu puestu. Otru tantu-y pasó a Ralf Schumacher (Williams), que perdió'l lideratu pa dexá-ylu a Montoya y yá namás pudo recuperar hasta la 4ª plaza.

Sicasí, el retrasar la primer parada valió-y a Fernando pa tener que cargar mui poca gasolina na segunda, colo que salió mui rápido de boxes y pudo entrar a pista per delantre de Trulli y Coulthard (McLaren), que pararen una vuelta primero que l'asturianu. Alonso facíase asina, a falta de tener coche p'aspirar a más, con una quinta plaza que-y val puntos abondos pa quedar terceru na xeneral del mundial. Otramiente, Renault promete motor nuevu pa la siguiente carrera nel Canadá, y anunció que diba apostar por una estructura más clásica en cuenta del bloque colos cilindros en V estrencha que taben prebando.