Fonsu Fernández va analizar los contautos ente la música popular y culta nel repertoriu de la gaita asturiana na charra mensual d’Ástura

Esti martes va tener llugar una nueva sesión de les charres mensuales d’Ástura. El musicólogu Juan Alfonso Fernández García ‘Fonsu’ va protagonizar la conferencia ‘Los contactos entre música popular y música culta en el repertorio musical de la gaita asturiana’.

El direutor del Muséu de la Gaita va repasar cómo “dende la segunda metá del sieglu XX hasta anguaño vieno recoyéndose n’Asturies una bayurosa coleición de melodíes tradicionalmente interpretaes cola gaita. Yá a fines del sieglu XX, nel contestu políticu del desendolcu del autonomismu y en plenu procesu d’anovación acústica del instrumentu, entámase a deprender la so téunica y a codificar el so repertoriu axustándolu a les normes académiques, procesu que fina en 2006 cola inclusión de la gaita nos programes de los Conservatorios Profesionales de Música d’Uviéu y Xixón. Una música oral o folk camudóse, entós, nuna música escrita o ‘d’arte’”, apunten dende l’asociación cultural qu’entama l’eventu. Esti repertoriu pese a venir de manera mayoritaria de la tradición oral, tien dellos exemplos nel que se pue atopar un raigañu cultu, “o, pelo menos, un ñidiu contautu col ámbitu de la música culto, a la que la gaita sirve unes veces d’inspiración y de la que, notres ocasiones, toma melodíes enteres que güei etiquetamos como ‘tradicionales’”. Asina, el conferenciante va xurgar neses melodíes tratando de reconstruyir el camín pel que llegaren a popularizase como melodíes de gaita.

Fonsu Fernández ye Llicenciáu en Filoloxía Hispánica pola Universidá d’Uviéu y  Doctorando en Musicoloxía, y dende’l 1997 lleva les riendes del espectacular Muséu de la Gaita asitiáu nel Pueblu d’Asturies. Tien espublizaos los llibros ‘Guía didáctica del Museo de la Gaita’ (2000) y el ‘Cancionero de la gaita asturiana’ (2 tomos con estudiu históricu y partitures, 2011), amás de numberosos artículos sobre esta temática. Nel aspeutu musical, foi autor del discu ‘Ea, señores usías. Cantares y sones de ciegu n'Asturies’ (1999), perteneció al grupu Lliberdón y collaboró como instrumentista con Brenga Astur, el Grupu Cultural Xana o Muyeres. La so conferencia sobre esti tema tan interesante va celebrase, como ye vezu nes charres d’Ástura, nel Atenéu Obreru de Xixón a partir de les 19.30 hores, con entrada llibre.