Fomentu afirma que l'AVE ente Madrid y Xixón va facer el recorríu en menos de trés hores

La secretaria xeneral d'Infraestructures del Ministeriu de Fomentu, Josefina Cruz, afirmó güei que l'AVE que va axuntar Madrid con Xixón va facer el trayectu enteru nel plazu de 2 hores y 50 minutos, un tiempu que va ser de 2 hores y 35 minutos na conexón con Uviéu "en cuantes que tean terminaes toles infraestructures de la llinia"

.

La secretaria, que compareció na Comisión de Fomentu y Vivienda del Congresu de los Diputaos, esplicó que'l trayectu Madrid-Uviéu toma anguaño, pasando peles ramples del puertu Payares, un tiempu de 5 hores y 40 minutos. N'entrando en serviciu'l tramu d'AVE ente Madrid y Valladolid a últimos del 2007, la secretaria afirmó qu'esi tiempu va baxar a 4 hores y 25 minutos. La siguiente baxada de tiempu va tener llugar cola entrada en serviciu de los túneles de payares, prevista pa últimos del 2009, que va dexar el tiempu en 3 hores 35 minutos, faltando dempués l'afayamientu de la rede asturiana pa la circulación del AVE. La diputada del PP Alicia Castro Masaveu, retrucó a la portavoz ministerial que ye imposible anunciar tiempos de viaxe mientres nun se defina'l proyectu y recordó que'l presidente asturianu Vicente Alvarez Areces "reconoció que l'AVE nun va llegar a Asturies hasta'l 2011", polo que reclamó un compromisu de fecha concretu.