Finó la periodista Menchu Álvarez del Valle

La llocutora usó la so voz pa dar visibilidá al asturianu nes décades de los 60 y 70.

El llunés dexónos Menchu Álvarez del Valle, periodista qu'acompañó dende les ondes de Radio Oviedo y RNE a miles d'asturianes y asturianos per décades. Nacida en Santander nel 1928, contaba con 93 años y nos años últimos pasó a ser más conocida, magar el so bon llabor y trayeutoria profesional, por ser la güela de Letizia Ortiz, anguaño reina d'España llueu de contrayer matrimoniu con Felipe de Borbón y Grecia, coronáu como Felipe VI.

Cercana siempre a la cultura asturiana, na década de los 60 y 70 comprometióse cola visibilización de la llingua asturiana. Asina, recitó poemes n'asturianu pa dellos discos y participó n'actividaes del coleutivu Amigos del Bable.

Na semeya, discos n'asturianu d'Álvarez del Valle pertenecientes a la estensa coleición d'Inaciu Galán.