Fin de selmana musical: Desakato, Rebolleres Rock y Nueche Celta de Granda

|

Esta fin de selmana va tar protagonizada pola música yá que, amás de la programación del Festival Intercélticu d'Avilés y del Festival Arcu Atlánticu, ye posible de disfrutar de cites destacaes tanto güei, como mañana y el domingu. Asina, esta nueche Tresona celebra les fiestes de San Pelayo con un eventu dedicáu al rock que tien a Desakato como cabeza de cartelu. Los conciertos, nel que tamién participen Ofensivos y Franklin Soul, principien a les 23.30 hores nel prau asitiáu xunto al centru cultural.

Tamién el rock va protagonizar mañana'l VI Rebolleres Rock, otra vegada más nel prau Gervasia de Candás. Nesta ocasión, el convidáu ye la banda andaluza Reincidentes, que va tar acompañada de Rock'n'Guaḥe, Escuela de Odio y Skama la Rede. Los conciertos, que principien a les 19 hores, son de baldre, anque la organización pide a les persones que s'acerquen que traigan alimentos imperecederos o material escolar pa families necesitaes.

Zarra la fin de selmana festiva la tradicional Nueche Celta de Granda, que suma yá ventiocho ediciones. Esta folixa tan prestosa que se celebra nun marcu incomparable, como la carbayera de Granda, cuenta tamién con trés invitaos de primer nivel: Cerezal, Tejedor y La Coḷḷá Propinde. La fiesta principia a les 21 hores y allárgase hasta bien entrada la madrugada.

Contador Estadistiques