Fernando Alonso, meyor tiempu en Xerez

El pilotu asturianu del equipu Renault de Fórmula 1 Fernando Alonso demostró ayeri pela tarde les posibilidaes del coche nuevu pa la temporada qu'entama'l mes qu'entra, marcando nel circuitu andaluz de Xerez un tiempu de 1:15.732 que dexa al asturianu a una décima del récord de Michael Schumacher nesta pista (1,15,650) un tiempu que l'alemán consiguiere con un coche con especificaciones del 2004, cuando los bólidos podíen llevar más carga aerodinámica.

Como pue suponese pol tiempu consiguíu, l'asturianu entrenó fizo ayeri una parte del entrenu colos tanques de gasolina del coche vacios, mientres que tolos demás pilotos de les escuderíes presentes en Xerez (Ferrari, Toyota, Renault y McLaren) probaron tol tiempu los coches en condiciones de carrera, enllenos de gasolina, rodando en tiempos de 1,16 p'arriba. El colombianu Juan Pablo Montoya demostró que'l Mclaren Mercedes del 2005 va ser ún de los coches de referencia, faciendo un tiempu de 1:16.448, mientres que'l compañeru d'Alonso, l'italianu Fisichella, fizo un tiempu de 1:16:654. Los Ferrari y Williams, teóricos aspirantes al títulu, nun rescamplaron polos sos tiempos nuna xornada en qu'Alonso dio un total de 101 vueltes a la pista andaluza ensin rexistrar mayormente problemes mecánicos, lo que diz muncho del nivel que ta garrando'l coche