Fernando Alonso entama con podiu

La temporada más llarga na historia del mundial de Fórmula 1 celebró la primera de les sos 19 carreres esti fin de selmana n'Australia. Si dalgo quedó claro na pista d'Albert Park foi que los cambeos nel reglamentu, que desanicia les ayudes electróniques nes arrancaes y torga l'aerodinámica de los coches, va facer d'esti un campeonatu muncho más igualáu y nel que les manes del pilotu van tener munchu más protagonismu que la superioridá técnica.

Ver veráse cuanto va durar esta igualdá, pero preba d'ello foi que los 10 primeros del Gran Premiu acabaren na mesma vuelta, qu'equipos que teóricamente tendríen d'asitiase nel pelotón B de les carreres, casu del Red Bull Ford tuvieren nos puestos d'alantre o qu'incluso Renault, que se supón qu'anda un pasín tres de Williams, McLaren o Ferrari, pudiere estrenar l'añu ganando la carrera australiana, anque ensin dulda, el meyor exemplu de la igualdá que ta acabante d'imponese na F1 foi la carrera que firmó Fernando Alonso, con una remontada de diez puestos y una vuelta rápida en carrera qu'ablayaron a la xente de casa y a los de fuera.

La cosa pintaba mal p'Alonso, que salía nel 13 puestu de la parriya por culpa del agua que-y cayó nos entrenamientos y que torgó que l'asturianu pudiere facer meyor tiempu, mientres que'l so compañeru Fisichella fizo la pole cola pista más seca. Imponiéndose a les circunstancies, Fernando fizo una salida de llibru ensin falta d'ayuda electrónica, comiendo trés puestos y mangándose yá na 10 plaza en llegando a la primer curva. Alonso alcontró más resistencia en Jacques Villeneuve, pero en pasándolu entamó una remontada na que contó cola ayuda de los mecánicos del equipu. Retrasando les paraes en box, qu'amás foron mui rápides, Fernando llegó a a la cuarta posición, entamando un últimu ataque sobre David Coulthard. L'escocés acabó cediendo y Alonso echóse a por Rubens Barrichello, que taba salvando l'honor de la Ferrari nuna carrera mala enforma pa Schumacher. Anque'l brasileñu llevaba trabaos los frenos d'atrás, Alonso ya nun tuvo tiempu pa más, entrando en meta a 1,2 segundos del Ferrari y a 6 de Fisichella, un compañeru d'equipu que venía de segundón pero que va dar muncho que falar. La siguiente carrera va ser en Malasia a la vuelta de 15 díes, y ellí va vese como respuenden los motores, qu'agora tienen d'aguantar dos carreres en cuenta d'una sola.