Fernández-Osorio visita Xixón, Grau y Ḷḷena con Autores nel Camín

|
Alejandro Fernández-Osorio

El ciclu lleva tamién a Sidoro Villa a Xixón, a José Ángel Gayol –que tien otru actu n'Avilés– a Llangréu y a María José Fraga a Ortigueira.

Autores nel Camín aprovecha la presencia n'Asturies d'Alejandro Fernández-Osorio, escritor residente en Madrid, pa programar trés cites esta selmana d'esta iniciativa de la Conseyería de Cultura, Política Llingüística y Turismu que busca averar a los llectores los ganadores de los Premios Lliterarios. El de Viḷḷayana va tar el xueves nel so conceyu, en La Pola (19 hores, Casa Cultura), pa falar a los presentes de 'Tayu', obra merecedora del XXVI Premiu Xuan María Acebal de poesía, mentes que güei va visitar Xixón (19 hores, salón d'actos de la Escuela de Comerciu) y mañana Grau (19.30 hores, Casa Cultura).

Nun son los únicos eventos programaos d'esti ciclu. El xueves Villa, ganador del XLI Premiu Xosefa Xovellanos de novela con 'El fervinchu', participa tamién en Xixón (19 hores, salón d'actos de la Escuela de Comerciu) na actividá que la Fundación Municipal de Cultura, Educación y Universidá Popular encuadra nel programa 'Ente fueyes. Ochobre lliterariu'.

Pela so parte, Gayol acude a Ciañu (20 hores, Casa de los Alberti) pa falar de 'El silenciu invisible', XXV Premiu Máximo Fuertes Acevedo d’ensayu, correspondiente nesti casu al 2019. L'autor mierense, amás, va tar mañana n'Avilés, nel Muséu de la Historia Urbana, pa participar a les 19.30 hores nes 'Charres del Muséu' qu'entama la Estaya de la Llingua, con exemplares de baldre d'esta obra pa los 15 primeros asistentes.

Yá de vienres, María José Fraga va presentar na Biblioteca d'Ortigueira, a les 19.30 hores, el so poemariu 'Equipaxe de mao'.

Na semeya, Fernández-Osorio.

Contador Estadistiques