Fernández León descarta rectificaciones na política de la Llaboral por tar "perfectamente establecida"

El viceconseyeru de l'Axencia pal Desarrollu de Proyectos Culturales, Jorge Fernández León, aseguró ayeri que la política cultural de la Universidá Llaboral ta "perfectamente establecida" y refugó que se tenga de facer nenguna rectificación. Fernández León retrucaba asina a les declaraciones que fexere l'ex director rexonal de Deportes, Daniel Gutiérrez Granda, que la selmana pasada dimitiera del puestu de coordinador del teatru de la Llaboral emitiendo dures crítiques al mesmu Fernández Leon y al presidente asturianu Vicente Álvarez Areces pol elitismu de la programación cultural del centru, onde aseguró que se-y facía de menos.

Fernández León, tres la inauguración de los Alcuentros de Cabueñes, señaló que "nenguna persona del esterior" tien más intervención que cualquier otra sobre esta política, n'alusión a les valoraciones de Gutiérrez Granda. De la mesma manera, indicó que'l teatru de la Llaboral va inaugurase'l próximu día 19 d'ochobre, polo que les obres tán mui avanzaes. Fernández León apuntó que l'equipu del teatru lleva munchos meses trabayando pa la so puesta en marcha. Tamién indicó qu'en poques selmanes va dase a conocer la programación de la Llaboral. Nesti sentíu, esplicó que caltién abondos contactos col teatru Xovellanos, tanto'l so programador como él mesmu tres la so entrada nel Conseyu d'Alministración, pa coordinador los llabores de programación ente dambos equipamientos y desarrollar polítiques complementaries.