Fernández califica’l modelu d’estáu actual de “federal imperfeutu”

Javier Fernández salió satisfechu de la Conferencia de Presidentes, onde s’algamó “un alcuerdu de mínimos”. Entrugáu sobre la propuesta federalista del PSC, calificó’l modelu d’estáu actual de “federal imperfeutu”.

“Ye difícil avanzar hacia onde yá tamos", añadió’l recién reelixíu secreatriu xeneral de la FSA-PSOE. Sicasí, almitió qu’esisten tantos modelos federales como estados d’esi tipu hai nel mundu, y lo qu’habrá que debatir nel so momentu ye qué federalismu quier el PSOE. Será ellí, añadió, onde caún esponga la so posición.

No que respeuta a la Conferencia de Presidentes, destacó qu’hubo “un alcuerdu de mínimos”, anque confesó la esistencia de discrepancies en rellación col sistema de financiación autonómica vixente, qu’enmarca dientro de lo "normal". "Yera importante treslladar una imaxen positiva", sorrayó. En declaraciones feches nel Senáu, Fernández señaló que tolos presidentes tuvieron "coincidencia d’idees" col euru y espresado una "opinión unánime" p’avanzar na xunión económica y política superando una doctrina d’austeridá "que ye casi de probeza inducida" y que lleva al "descreitu" énte la sociedá.

Según esplicó, Asturies insistió n’apostar por midíes d’estímulu al crecimientu y por un cambiu de modelu, yá qu’entiende que l’Estáu nun pue ser namái un destín turísticu, sinón qu’ha de favorecer tamién la producción industrial y la capacidá teunolóxica. Fernández felicitóse de qu’esta Conferencia de Presidentes sirviera pa constatar que’l problema del Estáu nun son les comunidaes autónomes y llamentó que nos tiempos últimos se diera una imaxe del modelu como la de "un monstruu de 17 cabeces". Punxo como exemplu’l casu d’Asturies, que nel 2002 recibió la transferencia de sanidá "ensin pidila" y que xestiónola con unos niveles de déficit asemeyaos a los qu’había cuando la competencia yera estatal.

Nun se sacó’l tema de l'autodeterminación de Catalunya

Fernández aseguró que nes ocho hores de reunión de presidentes nun hubo alusión nenguna a la pretensión d’ Artur Mas de convocar un referéndum d’autodeterminación en Catalunya. Tamién almitió "discrepancies" alredor del sistema de financiación autonómica vixente, pa depués señalar que la so aplicación evaluaráse nel comité téunicu permanente pa tomar una decisión nel so momentu nel Conseyu de Política Fiscal y Financiera. Al final de lo que definió como un "debate normal", algamóse un testu de consensu nel que "se pidió y alcordó más collaboración, más llealtá y más cooperación".