Feble xuba de les bolses en mayu

Col pieslle del mes de mayu los brokers, analistes y inversores fain analis d´un probetayu mes onde l´ Ibex solo medró un 0,3%. Sicasí, los mercaos europeos yá lleven dos meses consecutivos de xubes dempués d´un llargu tiempu de perdes. L´Ibex peslló'l vienres con una xuba del 0,4% p´asistiase nos 6.508,5 puntos, mentantu que tuvo un avance selmanal del 2,55%, nuna selmana marcada pola OPA de Telefónica sobre Terra. La selmana pasada trancó con una cayida del euru y con tolos inversores enfotaos nuna posible baxada de tipos d´interés por parte del Bancu Central Européu (BCE).



Ente les estadístiques de la selmana pasada, la de la Universidá de Michigan sobre´l datu de confianza d´Estaos Xuníos nun cumplió les espectatives de los analistes, algamando l'índiz los 92,1 puntos cuando los analistes con llegar hasta los 93 puntos. Tamién foi perimportante'l datu de manufactures de la Universidá de Chicago, que dio anuncia d´un bon resultáu. Otramiente les estadístiques de paru en Francia, de ventes minoristes n´España y d´inflación n´Italia nun influyeron nos mercaos, que taben pendientes del euru y de la posible baxada de tipos del BCE. Nos mercaos internacionales destaquen les xubes de les bolses del Vieyu Continente onde Francfort medró penriba´l 2,5%. Les places de Madrid, Londres y Paris tuvieron xubes mui discretes. Por poner un casu, l´índiz selectivu de la Bolsa de París, el CAC-40, solo meyoró un 0,75%. Otramiente Wall Street peslló'l vienres en positivu dempués d´un mes de mayu marcáu poles xubes. El tecnolóxicu Nasdaq algamó los 1.595,9 puntos con una xuba del 1,33% mentantu'l Dow Jones peslló en 8.850,3 meyorando un 1,6%.



Nel parqué madrilanu la noticia estrella de la selmana foi la OPA de Telefónica sobre Terra. Un probetayu 5,25 euros aición ye la ufierta de la matriz del Grupu Telefónica por un valor especulativu que llegó algamar en tiempos de la burbuya d´Internet los 140 euros aición. Enfadu y sensación de pufu a los accionistes de Terra mentantu Telefónica reorienta la so actividá na rede faciendo negociu dende una llegalidá inxusta y poco tresparente. Ensin dulda esta operación d´esclusión de les bolses de Terra a traviés d´una OPA del 100% del so capital por parte de Telefónica va dar muncho de que falar nes prósimes selmanes. El casu ye qu'esta anuncia nun ye bona tampoco pal desarrollu d´Internet nel Estáu ya que supón la fin del apueste de Telefónica pola rede.



Ente otros valores, el vienres destacó Zeltia cola salida del director d´I+D de la so filial biotecnolóxica Pharma Mar por discrepancies cola estratexa investigadora de la empresa. Ello nun-yos prestó un res a los accionistes que vendieron hasta una cayida del 3,1% del valor. Acerinox tampoco nun tuvo una bona selmana con una cayida penriba´l 2%. Nel lláu de les ganancies destaquen Bankinter, TPI, Gamesa y Vallehermoso, con xubes penriba'l 3%, siendo l'avance de la última'l resultáu de la so fusión cola constructora más rentable del Estáu: Sacyr. A la contra ENAGAS, REE, Altadis, NH Hoteles, Ferrovial y Metrovacesa pesllaron las selmana con perdes. Los blue chips tuvieron una bona selmana na Bolsa de Madrid cola escepción de Telefónica. L´índiz xeneral de la Bolsa de Madrid asistiose nos 679,75 puntos mentantu l'índiz Nuevu Mercáu algamó los 1.789,70 puntos con unes xubes del 2,39% y 7,57% respectivamente.

El preciu del petróleu medró un 0,85% mangándose nos 26,25 dólares. Según dellos analistes esta xuba respuende a la cayida nes reserves d´Estaos Xuníos. L´euru finó la selmana nos 1,177 dólares, mui perbaxo de los 1,19 dólares que marcó nel pieslle del xueves pasáu. Esta baxada foi principalmente pola anuncia del presidente d´Estaos Xuníos George W. Bush de facer una política monetaria sofitada nun dólar fuerte, mui lloñe de la realidá d'agora. Perimportante cayida del Euribor que-yos prestó asgaya a los inversores. De fechu los futuros sobre´l índiz pesllaron el mes de mayu con un preciu mediu de 2,252, mínimu hestóricu que supón un avisu de la prósima baxada de tipos d´interés del Bancu Central Européu. Los analistes financieros consideren bono que se-yos meta tixera a los tipos d´interés na Zona Euru col oxetivu d´emburriar y da-y puxu a la economía d´Alemaña. El motor d´Europa ta nuna situación permala y la recesión económica teutona pue estendese al restu de los países europeos. El prósimu 5 de xunu vamos saber si el pesu de la economía d´Alemaña ye talu sobre la política monetaria común como pa que´l BCE de anuncia d´una baxada de mediu puntu p´asistiar los tipos del 2,5% al 2%.