Estúdiase la declaración de Redes como parque nacional

Un informe del Ministeriu de Mediu Ambiente conseña la posible declaración de Redes, Mampodre y l'altu Ayer como un espaciu del que podría salir un posible Parque Nacional qu'aumentaría'l reconocimientu del actual Parque Natural a la máxima categoría de protección posible. Con too y con ello, esta posible declaración nun tendría influyencia sobre l'embalse de Caliao (Casu), la polémica infraestructura que quier construyise en Parque de Redes y que volvió esta selmana a l'actualidá pol enfrentamientu ente la Federación Socialista Asturiana y la Plataforma pola Defensa de Redes a cuenta del proyectu.

Anque dende sectores comprometíos cola defensa del Mediu Ambiente vese como daqué positivo'l que s'estudie facer de Redes Parque Natural, la posible declaración nun tendría repercusión directa sobre l'embalse de Caliao. Fontes de la Coordinadora Ecoloxista esplicaron a esti mediu que, en tou casu, l'embalse podría incluyise nel Plan Rector del futuru parque lo mesmo que pue facese nel actual Parque Natural.

L'anuncia de Mediu Ambiente llegó la mesma selmana en que la la diputada socialista María Luisa Carcedo fexo declaraciones a la prensa asegurando que'l banzáu de Caliao yera "la meyor" y "única" opción pa furnir d'agua'l centru d'Asturies. La Plataforma pola Defensa del Parque Natural de Redes, grupu d'oposición al embalse nel que participen más de venti organizaciones y partíos políticos, retrucó a estes declaraciones con una nota na que-y esixe a la Federación Socialista Asturiana que "dexe trabajar" a los técnicos que tán evaluando les alternatives a la obra de Caliao y que nun desinforme con "opiniones "parciales". Mientres la plataforma-y pide-y a la FSA-PSOE qu'abandone la so posición "dogmática y alarmista" sobre la necesidá de construyir el que sedría tercer embalse del Nalón, la mesma agrupación socialista de Casu,el conceyu afectáu pola posible obra, declaró al traviés del so secretariu Carlos Peón, tar en contra del embalse.

La Plataforma defende que ye posible meyorar la rede actual de traides d'agua n'Asturies, entamando actuaciones d'aforru d'agua y utilización más racional d'esti recursu primero de pensar en más obres nel ríu.