“Esta obra abre caminos pa da-y un mayor protagonismu a la muyer na lliteratura asturiana”, señala Galán

‘Los cuartos propios de la lliteratura asturiana: una conversación colectiva’ ganó’l I Premiu Yolanda Huergo de trabayos d’investigación n’asturianu, “a la que quiero pensar que-y prestaría lleer esta obra, que ye la mio grana azul del futuru, na que posé’l corazón y na que pongo la esperanza”, apuntó Inaciu Galán na entrega del gallardón. L’espaciu del xixonés Muséu Barjola que Grana preparó pal actu quedó pequeñu.

Representantes municipales de Foro (Jesús Martínez Salvador), PSOE (José Ramón Tuero), Izquierda Xunida (Noelia Ordieres) y Podemos (Olaya Suárez) nun quixeron perder la oportunidá d’acudir el vienres a esti eventu –tampoco la diputada de Podemos, Cova Tomé, y la so compañera d’equipu y conceyala na llexislatura pasada nel mesmu grupu qu’Huego, Laura Tuero– nel que, como nun podía ser d’otra forma, la so compañera tuvo siempre nel recuerdu. Xunto a ellos, familiares, amigos y persones que trabayaron cola xixonesa en munches de les causes nes que s’enfotara.

Naciu Varillas encargóse de presentar esta entrega del premiu qu’abrió Xel Pereda con ‘Añada’, de Lucas 15. En representación de la familia intervieno Carla Huergo, responsable de la escultura del premiu, nel que rescampla una flor de cambrión o xiblata y nun llateral detalles del zarru de la casa familiar, pa depués dar pasu al secretariu de l’asociación Grana, n’Alcordanza de Yolanda Huergo, Pablo R. Alonso, y tamién del xuráu, pa la llectura del acta y la entrega del gallardón.

Galán apuntó a los presentres que-y fai “muncha ilusión recibir esti premiu por delles razones. La primera d’elles ye la d’estrenalu. Ser el primeru ye una responsabilidá, pero tamién un honor. Sicasí, el mayor honor ye recibir un premiu col nome de Yolanda Huergo, una muyer a la qu’almiraba pol so llabor y pol so compromisu con tantes causes xustes y necesaries”. En tiempos “abegosos pa los valores que defendía Yolanda” afaló a trabayar xuntos y xuntes pa que nun valten los llogros comunes en materia de drechos y llibertaes”.

Nesti puntu, añadió que “apuesto que diba siguir trabayando por toes eses causes, dando la cara y esbrexando, como fixo hasta la fin de la so vida. Ye por ello que quiero güei recordala dende l’almiración pol so llabor y dende la llección de trabayu que nos dexó”.

Falen les escritores actuales

Sobra la obra que-y valió pa llevar esti premiu esplicó que “ye una conversación colectiva que va percorriendo la hestoria de la lliteratura asturiana creada por muyeres. Una hestoria qu’entama coles muyeres escritores que nun sabíen escribir, les muyeres que tresmitieron les hestories, los cuentos, los cantares... Porque la tradición oral ye bien importante en toles cultures, pero especialmente nes cultures espresaes en llingües minorizaes, como la de nueso, porque cuando se nos torgaba deprender a escribir l’asturianu, ehí taben les muyeres conservando na alcordanza y tresmitiendo cola pallabra”.

Nella recueye’l testimoniu “de más de mediu centenar de muyeres qu’escriben güei, nel sieglu XXI, dende la voz madura de Nené Losada y Sabel de Fausta, a les voces de les más moces, como Laura Marcos o Alba Carballo, pasando pelos testimonios de les autores yá afitaes nel canon d’anguaño, como Berta Piñán, Marta Mori, Esther Prieto o Pilar Sánchez Vicente”. Autores que-y permitieron, llueu d’hores d’entrevistes con elles, afilvanar “una hestoria conxunta, una charra creo que prestosa, que pon sobre la mesa más interrogantes sobre’l pasáu, el presente y el futuru de les muyeres qu’escriben nesta llingua que llucha por siguir impulsándose escontra’l futuru”.

“Nun tiempu nel que munchos homes, y dalgunes muyeres, entá nun son conscientes del camín que queda por andar pa la igualdá plena, más que nunca ye importante que sintamos qué tienen de dicir les muyeres en cada ámbitu. Pamidea qu’esta obra abre caminos pa da-y un mayor protagonismu a la muyer na lliteratura asturiana, p’asitiar a figures cuasi escaecíes nel llugar que-yos correspuende y esperar que les idees que semamos agora, seyan frutu granible d’igualdá”, rescampló Galán, que na so intervención citó a Xosefa Xovellanos, aprovechando pa reclamar el cambiu del nome de L’Argandona, cai d’El Llano na so memoria que lleva’l nomatu que tenía en referencia al so maríu –“que nun pase un mandatu más ensin correxir esta inxusticia, que la primer muyer que conocemos escribiendon’asturianu tenga la reconocencia que merez”–; a Enriqueta González Rubín, primer novelista conocida de la lliteratura asturiana, obra que “tres llegar a imprenta nel so tiempu, sumióse na escuridá” hasta que se recuperó nel 2008 ; y les muyeres presentes na Real Academia Asturiana de les Artes y les Lletres, creada en 1919, “adelantándose más de sesenta años a otres academies, como la RAE, la francesa, la gallega o la vasca”.

Y ye que “nun hai dulda dala. El doble estigma de ser muyer y escribir nuna llingua minorizada queda claru nesta investigación que fai por poner un poco de lluz. Un trabayu nel que yo digo bien poco y quien falen son les espertes y los espertos na hestoria de la lliteratura asturiana, pero sobre manera, les propies escritores actuales”.

La necesidá d’enanchar el corpus de la investigación asturiana

La presidenta de Grana, Iris Díaz Trancho, agradeció pa finar l’amplia presencia de públicu, que dexó pequeñu l’espaciu preparáu na primer planta del Barjola, y destacó la importancia del gallardón y la figura d’Huergo. “Tamos mui contentos. Esti premiu ocupa un espaciu que nun había, yá que’l d’ensayu del Gobiernu, que ta mui bien y ye mui importante, nun tien un perfil académicu como ésti. Creemos que ye importante enanchar el corpus de la investigación asturiana”, espresó a Asturies.com.

Pal 2025 confimó l’entamu de la segunda edición d’esti premiu que nació cola idea de ser biañal, y respeuto a la obra ganadora de la primera, apuntó que ye “intersante y simbólica, al tratar sobre la lliteratura de muyeres”. Sobre los proyeutos de Grana pal 2024 esplicó que se van celebrar la segunda edición de les xornaes de l’asociación, que nel 2022 llevó ‘(Sobre)vivir n’Asturies. Presente y futuru del territoriu y la so población’, y nun descarta la participación en dalguna actividá más.

Y como arrancó, terminó. Xel Pereda pondría’l ramu d’un eventu qu’emocionó a tolos presentes cola interpretación del 'Cantar del ayerán que perdió la guerra' y de los ‘Los fayeos de mayo’.

Na imaxe, Pablo R. Alonso y Galán cola escultura de Carla Huergo. Semeya obra de Ruma Barbero.