Espertos internacionales van debatir sobre la situación del osu n’Asturies

El Conseyeru de Mediu Ambiente Francisco González Buendía va inaugurar mañana xueves el Seminariu "La Xestión de la Población Cantábrica d'Osu - El Problema de la Conectividá ente Núcleos, Conocimientos, Necesidaes y Opciones", qu'organiza la Dirección Xeneral de Recursos Naturales y Protección Ambiental.

Espertos n'estremaes materies rellacionaes cola conservación d'esta especie tan emblemática como'l francés Pierre Taberlet, l'italianu Piero Genovesi, el noruegu Jon Swenson, Gabriel Schwaderer o'l croata Djuro Huber, amás del biólogu Miguel Delibes, fíu del famosu escritor del mesmu nome, van debatir nel Hotel Reconquista d'Uviéu los díes 23 y 24 de marzu sobre los asuntos que más preocupen nel futuru del osu n'Asturies, como la viabilidá de grupos pequeños de población dende los puntos de vista de l'alimentación y la variabilidá xenética o la cría en cautividá.

Dellos problemes son los que tien d'enfrentar l'osu n'Asturies, siendo'l más grave d'ellos el de la francedura de la población en núcleos que nun tienen conexón ente ellos, anque d'otra manera la situación xeneral de la especie ta muncho meyor que va unos años. Asina, con más de cien animales según l'últimu censu, la población d'osu pardu nel occidente d'Asturies va camín de recuperase, mientres que la del oriente, que nun pasa de los 30 exemplares, tien más difícil salir alantre y nun se-y ve traza de que tenga viabilidá nun siendo que los dos grupos, l'occidental y l'oriental, llegaren a amestase. Amás de presentar un númberu importante d'exemplares, la colonia d'osos del occidente asturianu, col noyu más importante na reserva de Muniel.los, tien una tasa de reproducción mui alta, con una tasa más o menos estable del +7,5% añal dende mediaos de los años 90, cuando entornó la gravísima crisis demográfica que tuvo a piques d'acabar cola especie a últimos de la década de los 80.

Amás de la incomunicación ente los grupos oriental y occidental, que lleva arreyada problemes d'endogamia, tamién la mano humana ye otra de les amenaces pal osu, conseñándose la muerte d'animales por velenu y por trampes. La gran cantidá d'infraestructures que van tarazar la cordelera cantábrica en forma de carreteres, linies d'alta tensión o estaciones d'esquí tamién suponen un problema más al atacar l'habitat de la especie y facer más difícil la conexón ente los grupos de población.