Escontra’l Raigañu celebra’l II Filandón Popular

L’Asociación Cultural Escontra’l Raigañu entama esta fin de selmana en Llaranes el so II Filandón Popular. El vienres Fe Santoveña va dar una charra sobre les filanderes y el trabayu de la llana nel país, mentes que’l sábadu tán previstes les actividaes propies d’un filandón popular.

La primer actividá va desendolcase na sede d’Escontra’l Raigañu, asitiada nel tercer pisu del Centru Municipal d'Asociaciones d’esta población avilesina, y consiste na charra ‘Filanderes y Filandones. El trabayu de la llana n’ Asturies’. Nella, Santoveña va afondar nel trabayu de filar y teyer la llana, mui venceyáu “dende l’antigüedá a los trabayos domésticos de la muyer”. “Les filanderes dexaron la so buelga na mitoloxía, nel arte y na lliteratura popular. Tarees feches en solitario y na intimidá de la casa y la familia. Un ambiente bien diferente al de los tradicionales filandones asturianos, abiertos a la comunidá vecinal y al caltenimientu de las redes sociales, al cortexu y al entretenimientu”, apunten dende la organización. La cita ye a les 19.30 hores.

Mañana, a partir de les 18 hores nel Centru Social-Cultural de Llaranes, va tener llugar lo que ye un filandón popular, cola presencia de castañes, sidre del duernu, fritos de calabaza y otres llambionaes que van ellaborar les muyeres de l'Asociación d'Ames de Casa de Llaranes. Mentes, les filanderes de l'Asociación El Güeyu de Santa María Grau van ser les encargaes d'amosar l'oficiu del fusu, la rueca, etc. Tampoco nun podíen faltar los xuegos pa la reciella, los cuentos, los cantarinos, los bailles y les actuaciones musicales. Asina, tienen confirmarda la so participación, amás de los propios artistes d’Escontra’l Raigañu, Merce Santos, Xosé Antón Fernández ‘Ambás’, Ramsés Ilesies, Dani García de la Cuesta, David Varela y Santi Caleya.